«Aýyl – el besigi»: Qostanaı oblysynyń shalǵaı aýylyna gaz tartylady
QOSTANAI. QazAqparat – Áýlıekól aýdanynyń Qusmuryn eldi mekenine gaz qubyryn tartýǵa 4 mlrd teńge bólindi. Bul týraly Áýlıekól aýdany ákimi Erlan Temenov málim etti, dep habarlaıdy QazAqparat.
Aýdan ákiminiń sózinshe, qurylys-montajdaý jumystary 3 jylǵa shaqtalǵan. Ony respýblıkalyq jáne oblystyq bıýdjet qarjylandyrady. Kógildir otyn ıgiligin qusmuryndyqtar ǵana emes, Chernıgov aýylynyń turǵyndary da kórmek.
«Jobada kórsetilgen úsh jyl aıasynda merdiger kompanııalar gaz jetkizýshi jáne taratýshy jelilerdi salýmen aınalysady. Gaz qubyryn tartýǵa 4 mlrd teńge bólindi. Osylaısha, Áýlıekól, Qusmuryn jáne Chernıgov aýyldaryn gazdandyrý arqyly aýdannyń 70% turǵyny tabıǵı otynmen qamtylady. Budan bólek, aýdan ortalyǵyndaǵy 1,5 mlrd teńgege eseptelgen jalpy uzyndyǵy 123 shaqyrymdyq gaz taratý jelisiniń qurylysy aıaqtalýǵa jaqyn qaldy», - dep túsindirdi Erlan Temenov.
Aıta keteıik, gazdandyrý jobasy «Aýyl – el besigi» baǵdarlamasy sheńberinde iske aspaq.
