Aýyl - el besigi: Qostanaı oblysynda jıyrma aýylda 47 joba qolǵa alynǵan

QOSTANAI. QazAqparat - QR Premer-mınıstri Asqar Mamınniń tapsyrmasy boıynsha QR Ulttyq ekonomıka mınıstri Áset Erǵalıev Qostanaı oblysyndaǵy «Aýyl – el besigi» jobasy sheńberinde júzege asyrylyp jatqan birqatar áleýmettik nysan men kásiporyndy aralady, dep habarlaıdy QazAqparat.

«Aýyl – el besigi» jobasy ınfraqurylymdy jáne negizgi qyzmetterge qoljetimdilikti jaqsartý arqyly aýyldaǵy ómir súrý sapasyn jaqsartýǵa baǵyttalǵan. Óńirler óz kezeginde barlyq jobany ýaqtyly, tıimdi jáne sapaly iske asyrýy qajet», - dedi Áset Erǵalıev.

Qostanaı oblysyndaǵy 520 aýylda 348 myń adam turady. 258 aýyldyń damý áleýeti joǵary.

«Aýyl – el besigi» jobasy sheńberinde bıyl respýblıka boıynsha 480 aýyldyq eldimekende 106 mlrd teńgege 1140 joba, onyń ishinde Qostanaı oblysynda 20 aýylda 5,8 mlrd teńgege 47 joba iske asyrylýda.

2022 jyly Qostanaı oblysynda 19 aýylda 3 mlrd teńgege 38 jobany iske asyrý josparlanýda.

Mektep, emhana jáne 4 sport nysanyn salý jáne qaıta qurý josparlanýda.

Sondaı-aq 2022 jylǵa 32 áleýmettik nysandy, onyń ishinde 6 bilim berý, 2 densaýlyq saqtaý jáne 24 kólik ınfraqurylymy nysandaryn jóndeý josparlanǵan.

Eń birinshi barǵan nysan Qamysty aýdanyndaǵy Qamysty aýylynda. Mundaǵy «ıÝnost» stadıony «Aýyl – el besigi» jobasynyń arqasynda qaıta jóndeldi.

Stadıon 2500 orynǵa eseptelgen. Sol aýylda mınıstr aýdandyq aýrýhananyń kúrdeli jóndeý jumysymen tanysty.

Odan ári Altynsarıno kentinde Ulttyq ekonomıka mınıstrligi basshysy gaz taratý jelisi qurylysy barysymen, sondaı-aq «Altynsarıno» JShS «PETKUS» astyq tazartý jáne suryptaý boıynsha tuqym jelisin salý jáne qurastyrý jumysymen tanysty.

Bul kásiporyndy 2022 jylǵy naýryzda paıdalanýǵa berý josparlanýda.

Tuqymnyń jobalyq ónimdiligi – 20 tonna/saǵ, taýarlyq astyq – 50 tonna/saǵ.

Taǵy bir nysan – Beıimbet Maılın aýdany, Tobyl aýylyndaǵy dárigerlik ambýlatorııa. Sońǵy 35 jylda emdeý mekemesine tek kosmetıkalyq jóndeý júrgizilgen.

«Aýyl – el besigi» jobasy boıynsha júrgizilgen kúrdeli jóndeý barysynda ǵımarattyń shatyry, qasbeti, irgeles aýmaǵy men ishki árleýi jańartyldy.

Jumys saparynyń ekinshi kúninde Qostanaı oblysynyń Shemınovskoe aýylyndaǵy gaz taratý jelisi men sý qubyry qurylysymen tanysqan vedomstvo basshysy Ozernoe aýylyna jol tartty.

Onda mektepti, sport keshenin jáne Mádenıet úıin aralady.

«Aýyl – el besigi» jobasy Elbasy Nursultan Nazarbaevtyń 2019 jylǵy 27 aqpandaǵy «Nur Otan» partııasynyń XVIII sezinde bergen tapsyrmalaryna sáıkes bastaý aldy.

Joba Prezıdent Qasym-Jomart Toqaevtyń tapsyrmasy boıynsha ázirlenip jatqan aýdan, qala, oblystardaǵy aýmaqtardy damytýdyń óńirlik baǵdarlamalary úshin jaqsy irgetas bolýda.