Aýyl – el besigi: Qostanaı oblysynda 46 joba júzege asyrylady
Óńirlik Ekonomıka jáne bıýdjettik josparlaý basqarmasynyń basshysy Gúlbaram Musaǵazına «Aýyl – el besigi» jobasyn iske asyrý týraly baıandady.
«Elbasy «Nur Otan» partııasynyń XVIII sezinde «Aýyl – el besigi» jobasyn iske asyrý týraly aıtqan edi. Jobanyń basty maqsaty aýyldyq jerlerde ómir súrý sapasyn jaqsartý, aýyldyq okrýgterdiń áleýmettik ortasyn jańǵyrtý ekendigi belgili. Osy maqsattarǵa 2019 jyly respýblıkalyq bıýdjetten 30 mlrd teńge bólindi. Jobany júzege asyrýdyń alǵashqy jylynda iri eldi mekenderge basa nazar aýdaryldy. Jobaǵa bes aýdan ortalyǵy qatysady. Atap aıtqanda, óńirdegi 548 aýyldyń ishinde 41 myńnan astam adam turatyn Áýlıekól, Qarasý, Borovskoe, Sarykól jáne Fedorov aýyldary osy tizimge enip otyr», - dedi basqarma basshysy.
Bıyl joba aıasynda 2,3 mlrd teńgege baǵalanǵan 46 joba júzege asyrylady. Bul – mektepterdi, mektep janyndaǵy ınternattardy, balabaqshalardy, qosymsha bilim berý uıymdaryn, mádenıet úılerin, kitaphanalardy, stadıondardy, aýdandyq aýrýhanalar men emhanalardy kúrdeli jáne aǵymdaǵy jóndeý, sondaı-aq kentishilik joldardy ortasha jóndeý sııaqty aýqymdy jobalar.
Barlyq jumysty tamyz aıynan qarasha aıyna deıin aıaqtaý qarastyrylǵan. 15 joba tolyǵymen aıaqtalǵan. 31 joba boıynsha jóndeý jumystary jalǵasyp jatyr. Búgingi kúni 800 mln teńge nemese bólingen qarajattyń 35% ıgerildi.
Oblys ákimi Arhımed Muhambetov aýdan basshylaryna jumys qarqynyn jedeldetip, bólingen qarjyny tıimdi ári tolyq ıgerýdi qatań tapsyrdy.
Selektorlyq otyrysta Sarykól, Qarasý, Meńdiqara aýdandary ákimderiniń atqarylǵan jumys barysy týraly esepteri tyńdaldy.
«Aýyl – el besigi» memlekettik baǵdarlamasyn iske asyrý úshin aýyldardy irikteý ákimshilik mártebesine, damý perspektıvasynyń bolýyna, halyq sanyna, shekara mańyndaǵy ornalasýyna jáne aýyldyq eldi mekenderdiń áleýmettik-ekonomıkalyq damý áleýetin sıpattaıtyn basqa da kórsetkishterine súıene otyryp júzege asyrylady. Qazirgi ýaqytta jobanyń 2020 jylǵy josparyna ený úshin aldyn ala jeti aýyl anyqtaldy. Olardyń ishinde aýdan ortalyqtary – Denısovka, Qamysty, Qarabalyq, Qarameńdi, Uzynkól, sondaı-aq, Sılantevka jáne Tobyl kentteri bar», - dedi oblys ákimi Arhımed Muhambetov.
Óńir basshysy Denısov, Qamysty, Qarabalyq, Naýyrzym, Altynsarın, Beıimbet Maılın jáne Uzynkól aýdandarynyń ákimderine bir apta ishinde oblystyq Ekonomıka jáne bıýdjettik josparlaý basqarmasyna tıisti nysanaly is-sharalarǵa jáne 2020 jylǵa josparlanǵan jobalarǵa arnalǵan qujattamany ázirlep, tapsyrýdy mindettedi.
