Aýyl – el besigi: Qordaıda sport-saýyqtyrý kesheni ashyldy

OTAR. QazAqparat – Jańa jyl qarsańynda Jambyl oblysynda taǵy bir sport-saýyqtyrý kesheni ashyldy. Bul joly nysan Qordaı aýdany Otar aýylynda paıdalanýǵa berildi, - dep habarlaıdy QazAqparat tilshisi.

«Aýyl - el besigi» baǵdarlamasy boıynsha sport kesheniniń qurylysyna 324 mıllıon teńge bólingen.

Aýyl turǵyndaryn qýanyshty oqıǵamen quttyqtaǵan aımaq basshysy Berdibek Saparbaev buqaralyq sportpen aınalysatyn turǵyndar sanyn arttyrý maqsatynda bıyl oblysta 13 sport-saýyqtyrý kesheni men 92 sport alańy salynǵanyn atap ótti.

«Sportshylarymyz álemdik arenada memlekettiń abyroıyn kóteredi, el namysyn qorǵaıdy. Olardyń sabaqtastyǵy urpaqtan urpaqqa jalǵasyp otyrýy kerek. Osy oraıda oblysta zamanaýı sporttyq nysandar boı kóterýde. Búgingi balalar erteń chempıon atanyp, jerimizdiń dańqyn asyrady dep senemiz. Buǵan deıin Otar aýylynda sport kesheni men Mádenıet úıi bolǵan emes. El basshylyǵynyń qoldaýynyń arqasynda bul másele sheshilýde», - dedi Berdibek Saparbaev.

Jańa keshende 300-ge jýyq bala jattyǵa alady. Nysan oıyn alańymen, kúres jáne sport zaldarymen, ústel tennısine arnalǵan bólmelermen jabdyqtalǵan.

Aýyl turǵyndary fýtbol, voleıbol, basketbol, kúres sektsııalaryna qatysyp, ústel tennısin úırene alady.

Jas fýtbolshylar aımaq basshysynyń syılyqqa berilgen doptaryn qýana qabyldady.

«Men balalarymyzdyń óz aýylymyzda ornalasqan zamanaýı, jaıly keshende jattyǵatynyna qýanyshtymyn», - deıdi aýyl turǵyny Zábıra Maıshybekova.

Aýdandyq dene shynyqtyrý jáne sport bóliminiń basshysy Dıdar Moldaǵalı jaqynda ǵana Áljan ana aýylynda osyndaı keshen ashylǵanyn, 31 jeltoqsanda Betqaınar aýylynda taǵy bir sport nysanynyń qurylysy aıaqtalatynyn aıtty.

Kelesi jyly aýdandaǵy Qarasaı, Qarasý, Aýhatty jáne Sarybulaq aýyldarynda sport keshenderiniń qurylysy bastalmaq.