«Aýyl - el besigi» Qaraǵandy oblysynyń aýyldaryn damytýǵa kómektesedi
Bıyl Osakarovka, Abaı, Aqtoǵaı, Buqar Jyraý, Qarqaraly, Nura jáne Shet aýdandaryndaǵy 11 aýyldyq eldi mekenge kóńil bólinedi. Olar áleýmettik, qurylys jáne TKSh salalarynda 19 jobany iske asyrýdy kózdep otyr.
Mysaly, Nura aýdanynyń Kertindi aýylynda feldsherlik-akýsherlik pýnkt, al Egindibulaqta - DSK salý qajet. Aıta ketý kerek, oblys ákiminen jergilikti turǵyndar sport nysanyn salýdy surap, birneshe ret ótingen bolatyn.
Shet aýdanynyń Aqadyr kentinde 3,8 km káriz jelileriniń qurylysyna jáne qyzmet kórsetýge, sondaı-aq 5 km sý qubyrynyń rezervtik jelisiniń qurylysyna aqsha jumsalady.
Osakarov aýdanynyń Molodejnyı kenti men Aqbulaq aýylynda 7 joba júzege asyrylmaq. Qarjylandyrý birneshe mektep pen aýyl joldaryn jóndeýge de bólinedi.
Jalpy joldarǵa keletin bolsaq, «Aýyl - El besigi» baǵdarlamasy boıynsha oblystyń úsh aýdanynda 35 km aýylishilik joldar jóndeledi.
Memlekettik baǵdarlama 2027 jylǵa deıin eseptelgen. Oblystyń barlyq tirek jáne seriktes aýyldaryn qamtý mindeti tur.
- Bıyl barlyq aýdandardy qamtý qajet. Biz jobanyń arqasynda aýyldardyń ınfraqurylymy jaqsaryp, tirek jáne seriktes aýyldarda turatyn aýyl turǵyndarynyń kásipkerlik belsendiligi artyp, turaqty jumys oryndaryn qurýdy qamtamasyz etetinin kórip otyrmyz, - dep atap ótti Qaraǵandy oblysynyń ákimi Jeńis Qasymbek.
Ótken jyldyń qorytyndysy boıynsha «Aýyl - El besigi» arnaıy jobasy aıasynda 47 joba boıynsha jumys júrgizildi. 2020 jyly bul baǵdarlamany qarjylandyrý 4 eseden astam ulǵaıdy. Toǵyz jalpy bilim beretin mektep pen bir sport mektebi jóndeldi, eki aýdandyq aýrýhana men dárigerlik ambýlatorııa ǵımarattary jóndeldi. 25 shaqyrym sý qubyry jelileri qaıta jańartyldy. 70 shaqyrym kentishilik joldarǵa jóndeý jumystary júrgizildi.
