Aýyl – el besigi: Qaraǵandy oblysynda 32 aýyldyń jaǵdaıy jaqsarady

QARAǴANDY. QazAqparat – Qaraǵandy oblysynda «Aýyl – el besigi» arnaıy jobasyna bıyl 32 aýyl qatysady. 33 áleýmettik mańyzy bar joba iske asady, onyń ishinde 22 eldimekende jol jóndeledi, dep habarlaıdy QazAqparat tilshisi.

Oblystyq ekonomıka basqarmasynyń basshysy Tatıana Ablaevanyń aıtýynsha, ótken jyly«Aýyl – el besigi» boıynsha 60 myńǵa jýyq adam turatyn 21 aýyl men kent jaqsarǵan bolatyn.

Turǵyndar úshin jańa sport nysandary salynyp, mektepter men ınternattar, mádenı ortalyqtar jóndeldi. Sondaı-aq joldar retke keldi.

Bul jumys belsendi túrde jalǵasady.

«Bıyl «Aýyl – el besigi» jobasymen 43 924 adam turatyn 32 aýyldy qamtý josparda bar. Buqar jyraý aýdany Gagarınskoe aýylyndaǵy mektepke qosymsha qurylys jalǵasady. Eki deneshynyqtyrý-saýyqtyrý kesheni salynyp jatyr – Buqar jyraý aýdanynyń Ǵ.Mustafın kentinde jáne Abaı aýdanynyń Topar kentinde», - dep atap ótti Tatıana Ablaeva oblystyq apparattyq keńeste.

Osakarov aýdany Aqbulaq aýylyndaǵy orta mektep qaıta jańarady.

Osakarov aýdany Batpaq, Sadovoe, Ozernoe, Shet aýdanyna qarasty Moıynty jáne Bosaǵa aýyldarynda bes mádenıet úıi kúrdeli jóndeýden ótedi.

Abaı, Osakarov, Nura jáne Buqar jyraý aýdandarynyń 22 eldimekeninde 134 shaqyrym kentishilik joldy jóndeý josparlanǵan.

«Bir aýyl – bir jyl degen qaǵıdany ustaný qajet. Biz bir aýylǵa kirip, bárin sheship, qaıta oralmaǵanymyz abzal. Aýdan ákimderi «Aýyl – el besigi» jobasy aıasynda aýyldardy keshendi damytý josparyn daıyndasyn. Búkil konkýrstyq rásimderden ýaqtyly ótip, jobalardy iske asyrýǵa kirisý qajet», - dep atap ótti oblys ákimi Ermaǵanbet Bólekpaev.