«Aýyl – el besigi»: depýtattar Qostanaıda kóshpeli otyrys ótkizdi

QOSTANAI. QazAqparat – Qostanaıda «Nur Otan» partııasy depýtattyq fraktsııasynyń kóshpeli otyrysy ótti, dep habarlaıdy QazAqparat.

«Nur Otan» partııasy oblystyq depýtattyq fraktsııasynyń jetekshisi Ekaterına Smyshlıaeva, máslıhat depýtattary Samat Aqyshev, Eskendir Qaıybjanov, Tatıana Býlgatsevıch Fedorov aýdanyndaǵy memlekettik baǵdarlamalardyń iske asyrylý barysyn qadaǵalap qaıtty.

Halyq qalaýlylary aldymen «Qutty meken» partııalyq jobasy sheńberinde Fedorov aýdanyndaǵy úsh qabatty úıdiń qurylysyn tekserdi. Atalmysh nysan qarasha aıynyń sońynda tapsyrylady dep josparlanǵan. Páter kilti áleýmettik osal toptardyń ókilderine tapsyrylady.

«Bul úı 24 páterli bolady. «Nurly jer» baǵdarlamasy boıynsha salynady. Qurylysqa 167 mln teńgeden astam qarjy bólindi. Qarjynyń 20,7 mln teńgesi jergilikti ákimdikten alyndy», - deıdi qurylysshylar.

Fedorov aýdanynda «Aýyl – el besigi» partııalyq jobasy aıasynda aýrýhana tolyq qalypqa keltiriledi. Buǵan qosa 5 shaqyrymnan astam aýylishilik jol jóndelgen. Sý máselesi de birtindep óz sheshimin tabýda.

Depýtattar Dımıtrov atyndaǵy №1 orta mektebiniń jetistikterimen tanysyp qaıtty. Jaz mezgilinde bilim oshaǵynda jóndeý jumystary júrgizildi. Zamanaýı robot tehnıkasy kabıneti ashylyp, elektrondy kitaphana men jańa kabınetter paıda boldy.

«1 shildeden bastap balalardy birinshi synypqa qabyldaýǵa tirkeý úrdisi avtomattandyrylǵan júıege kóshti. Bul ýaqytty únemdep, qujat aınalymyn qysqartty. Elektrondyq túrde kórsetiletin qyzmet túrleriniń sany 5 ese artty. Aǵymdaǵy jyldyń 8 aıynda 79 myńnan astam qyzmet kórsetildi»,- deıdi aýdan ákimdigi apparaty memlekettik qyzmet kórsetý bóliminiń jetekshisi Olga Slojenıkına.

Partııalyq baqylaý komıssııasynyń jumysynda bilim berý mekemelerindegi jemqorlyq máselesi talqylandy. Aýdan mektepterinde sybaılas jemqorlyqqa qarsy mádenıetti qalyptastyrýǵa baǵyttalǵan synyp saǵattary uıymdastyrylǵan.

Kóshpeli otyrystyń sońynda qoǵamdyq qabyldaý ótkizildi. Jergilikti jurtshylyq densaýlyq saqtaý, TQSh, mádenıet jáne ózge de suraqtar boıynsha júgindi. Aýdandaǵy memlekettik baǵdarlamalardyń iske asyrylý barysyn baǵamdap qaıtqan halyq qalaýlylary oń baǵasyn berdi.