Aýyl – el besigi: Bıyl Qostanaı oblysynda qandaı sharýa atqaryldy
Ekonomıka jáne bıýdjettik josparlaý basqarmasynyń basshysy Gúlbaram Musaǵazınanyń aıtýynsha, «Aýyl – el besigi» jobasy óńirde keshendi túrde iske asyp keledi. Byltyr 5 aýylda (Áýlıekól, Borovskoe, Qarasý, Sarykól jáne Fedorov) 2,2 mlrd teńge somasyna 46 joba iske asyrylsa, bıyl bul kórsetkish birneshe ese ósken.
«Qarasý aýdandyq aýrýhanasynyń korpýstarynyń birine kúrdeli jóndeý aıaqtaldy. Fedorov, Sarykól, Borovskoe, Áýlıekól aýyldarynyń aýdandyq aýrýhanalaryna aǵymdaǵy jóndeý júrgizildi. Sonymen qatar, atalǵan aýyldarda mádenıet jáne sport nysandary jóndeldi, kentishilik joldar ortasha jóndeýden ótti. 3 bilim berý nysany, balabaqshalar men mektep janyndaǵy ınternat jańǵyrtyldy. Sport obektilerine degen qoljetimdilikti qamtamasyz etý maqsatynda halyqtyń barlyq toptary úshin 1,7 mlrd teńge somasyna 4 ınvestıtsııalyq joba, onyń ishinde Sılantevka jáne Qamysty aýyldaryndaǵy stadıondar qaıta jańǵyrtylyp, Uzynkól, Torǵaı aýyldarynda dene shynyqtyrý-saýyqtyrý keshenderi salynýda. Áleýmettik nysandardy turaqty jylýmen qamtamasyz etý úshin Denısov aýylyndaǵy № 40 balalar baqshasynyń qazandyǵy paıdalanýǵa berildi jáne Qarameńdi aýylyndaǵy qazandyqtyń qurylysy aıaqtalýǵa jaqyn. Bólingen qarajat tolyq kólemde ıgerildi», - deıdi basqarma basshysy.
2020 jyly «Aýyl – el besigi» jobasy sheńberinde oblystyń 13 aýyly anyqtaldy. Olar: Sılantevka, Obaǵan, Denısovka, Antonovka, Qamysty, Torǵaı, Amangeldi, Tobyl, Qarameńdi, Pervomaıskoe, Oktıabrskoe, Shemınovka, Uzynkól aýyldary.
Barlyǵy 63 joba qolǵa alynbaq. Ony iske asyrýǵa 5 mlrd 772,3 mln teńge kózdelgen.
«Torǵaı jáne Qamysty aýyldaryndaǵy eki aýdandyq aýrýhana, Beıimbet Maılın aýdanynyń Tobyl kentindegi dárigerlik ambýlatorııa kúrdeli jóndeýden ótedi. Denısov mádenıet úıin kúrdeli jóndeý boıynsha jumystar aıaqtaldy. 13 aýylishilik joldyń ortasha jóndeýden ótýine qarajat bólindi. Jalpy, búgine deıin oblysta 48 joba aıaqtalyp, taǵy 9 jobada qol qoıý protsesi júrip jatyr», - dedi Gúlbaram Musaǵazına.
