Aýyl – El besigi: Bıyl Qostanaı oblysynda 3 mektep salynady

QOSTANAI. QazAqparat – Bıyl oblystaǵy bilim berý mekemelerin jóndeýge bıýdjetten 13,5 mlrd teńge bólindi, dep habarlaıdy QazAqparat tilshisi oblystyq bilim basqarmasyna silteme jasap.

Osy jyly óńirde 3 mektep salynyp, 30 bilim ǵımaratyna kúrdeli, 102 nysanǵa aǵymdaǵy jóndeý jumystary júrgiziledi. Aýqymdy jobalar negizinen «Aýyl - El besigi» jáne «Jumyspen qamtýdyń jol kartasy» baǵdarlamalary arqyly qarjylandyrylmaq.

«Mektepterdi kúrdeli jóndeýden ótkizý úshin 7,4 mlrd teńge qarastyrylǵan. Máselen, Qarasý aýylyndaǵy apatty jaǵdaıda turǵan bilim oshaǵynyń ornyna taıaýda 320 oryndyq jańa mektep qurylysy bastalady. «Jumyspen qamtýdyń jol kartasy» aıasynda júzege asyrylatyn bul jobanyń quny – 1.3 mlrd teńge. Jańa mekteptiń qurylysy bıyl jeltoqsan aıyna deıin aıaqtalmaq. Basqarma mamandary 2020 jyly júzege asatyn qurylys jobalary men kúrdeli jáne jeńil jóndeýden ótetin nysandar tizimin jasady. Bul tizimge jalpy somasy 9,2 mlrd teńge bolatyn 35 ınfraqurylymdyq joba enip otyr. Baǵdarlamany júzege asyrý barysynda 2300 ýaqytsha jumys orny ashylady», - deıdi oblystyq bilim basqarmasynyń basshysy Vasılıı Tsymbalıýk.

Aǵymdaǵy jóndeýden ótetin 102 nysannyń biri – Qostanaıdaǵy №17-shi orta mektep. 1979 jyly irgesi qalanǵan ǵımarat buǵan deıin kúrdeli jóndeý kórmegen. Jumyspen qamtý jol kartasy aıasynda bul jobaǵa 93 qurylysshy tartylyp otyr. Nysan tamyz aıynda tapsyrylmaq. Qazir bilim oshaǵynda jóndeý jumystarynyń 65%-y oryndalǵan.