«Aýyl – El besigi»: Bıyl Qaraǵandy oblysyndaǵy 11 aýylda 19 joba júzege asyrylady
QARAǴANDY. QazAqparat - Búgin áriptesterimizben «Aýyl – El besigi» jobasynyń 2021 jylǵa arnalǵan josparlaryn talqyladyq, dep habarlady Qaraǵandy oblysynyń ákimi Jeńis Qasymbek.
Bul týraly ol óziniń Facebook -tegi paraqshasynda jazdy, dep habarlaıdy QazAqparat.
«Bıyl atalǵan baǵdarlama boıynsha oblysymyzdyń 11 aýylynda 19 jobany júzege asyrýdy josparlap otyrmyz.
Olardyń arasynda Nura aýdanynyń Kertindi aýylynda feldsherlik-akýsherlik bekettiń qurylysy, turǵyndardyń suraýymen qolǵa alynǵan Egindibulaq aýylyndaǵy DSK qurylysy, sondaı-aq Shet aýdanynyń Aqadyr kentindegi jańa káriz jelileri men sýmen jabdyqtaýdyń rezervtik jelileriniń qurylysy bar. Sondaı-aq Buqar Jyraý aýdanynyń Doskeı aýylynda káriz jelilerin qaıta jańartý, Jańaarqa aýdanynyń Aqtúbek aýylyndaǵy mektepke sport zalyn salý, Abaı aýdanynyń Jartas aýylyndaǵy «Juldyz» mektep-balabaqsha kesheniniń, Osakarov aýdanynyń Molodejnyı kentindegi №23 jáne №26 orta mektepterdiń ǵımarattaryn kúrdeli jóndeý jumystaryn júrgizý qarastyrylýda»,-dep jazdy ákim.
Sondaı-aq onyń habarlaýynsha, jalpy, eki jyl ishinde «Aýyl - El besigi» baǵdarlamasy óziniń tıimdiligin kórsetip, aýyl turǵyndarynyń ómir súrýine qolaıly jaǵdaı jasap qana qoımaı, jergilikti turǵyndardy jumyspen qamtamasyz etýge múmkindik týǵyzdy.
Baǵdarlama aıasynda 2020 jyly 47 joba iske asyryldy. Onyń ishinde jóndeý jumystary toǵyz jalpy bilim beretin mektepte, bir sport mektebinde, eki aýdandyq aýrýhana men dárigerlik ambýlatorııada iske asyryldy. 25 km sý qubyry jelileri qaıta jańartyldy. Oblystyń 8 aýylynda 70 shaqyrym kentishilik joldarǵa jóndeý jumystary júrgizildi.
Sonymen qatar, 2020 jyly eki iri nysannyń qurylysy bastaldy. Olardyń qatarynda Buqar Jyraý aýdanynyń Botaqara kentindegi 320 oryndyq dene shynyqtyrý-saýyqtyrý kesheni jáne Aqtoǵaı aýdany Aqtoǵaı aýylyndaǵy mádenıet jáne demalys saıabaǵy bar. Atalǵan nysandardyń qurylysy bıyl aıaqtalady.
«Osy jobanyń arqasynda aýyldardyń ınfraqurylymy jaqsaryp, aýyl turǵyndarynyń kásipkerlik belsendiligi artyp, osy arqyly turaqty jumys oryndarynyń qurylatynyn kórip otyrmyz. «Aýyl - El besigi» memlekettik baǵdarlamasyn 2027 jylǵa deıin iske asyrý kózdelip otyr. Osy arqyly oblystyń barlyq tirek jáne seriktes aýyldarynda qajetti jumystardy júrgizý josparlanýda»,-deıdi Jeńis Qasymbek.
