«Aýyl – el besigi» baǵdarlamasy: Atyraý oblysynda 22 joba iske asyrylyp jatyr
ATYRAÝ. QazAqparat – Densaýlyq saqtaý mınıstri Alekseı Tsoı jumys saparymen Atyraý oblysyna «Aýyl – el besigi» baǵdarlamasynyń júzege asyrylý barysymen tanysý úshin keldi, dep habarlaıdy QazAqparat.
Atyraý oblysy ákiminiń orynbasary Qaırat Bekenovtiń aıtýynsha, bıyl atalǵan baǵdarlama iske asyrý úshin 66 myń adam turatyn 16 aýyldyq eldi meken tańdalǵan. Qazir bul eldi mekenderde 22 joba iske asyrylyp jatyr. Oǵan respýblıkalyq bıýdjetten 3,9 mıllıard teńge bólingen.
«Atyraý oblysynda 153 aýyldyq eldi mekende 300 myń adam turady. Bul – oblys turǵyndarynyń jalpy sanynyń 45%-y. «Aýyl – el besigi» jobasyn iske asyrý sheńberinde aýyldyq eldi mekenderdiń áleýmettik-ekonomıkalyq damý kórsetkishterin esepteýdiń jańa ádistemesi men modeline sáıkes oblysta 40 tirek, 38 spýtnıktik, 15 strategııalyq eldi meken bar. Budan basqa 60 aýyldyq eldi meken irikteldi. Qazir 5 aýyldyq eldi mekende 5 joba boıynsha jumystar aıaqtaldy. Atap aıtqanda, 4 aýylda kireberis jáne kentishilik jol jaryqtandyryldy. Qyzylqoǵa aýdanynyń ortalyǵy – Mııaly aýylyndaǵy sport keshenine kúrdeli jóndeý júrgizildi» - deıdi Qaırat Bekenov.
Densaýlyq saqtaý mınıstri Alekseı Tsoı Isataı, Mahambet jáne Inder aýdanyndaǵy áleýmettik nysandaryn aralady.
«Aýyldyq jerlerdi damytý jónindegi «Aýyl – el besigi» baǵdarlamasy aıasynda búgin Atyraý oblysynda ınfraqurylymdyq nysandar, mektepter, dene shynyqtyrý-saýyqtyrý keshenderi, aýrýhanalar, dárigerlik ambýlatorııalar qurylysymen tanystyq. Bul nysandardyń qalaı jumys isteıtinin kórdik. Aýylda medıtsınalyq kómek pen bilimniń qoljetimdiligi joǵary, jaqsy deńgeıde ekenine kóz jetkizdik. Atyraý oblysynda «Aýyl – el besigi» baǵdarlamasyn júzege asyrý qarqyndy júrip jatqanyn kórdim. Bul baǵdarlamanyń ár nysany Úkimettiń erekshe baqylaýynda tur» - dedi Alekseı Tsoı.
Eske sala ketelik, budan buryn Atyraý oblysynda orman qoryn molaıtýdyń keshendi jospary bekitilgenin habarlaǵan edik.
