Aýyl-el besigi: Ádilet mınıstri Almaty oblysynda jobalardyń iske asyrylýyn tekserdi

TALDYQORǴAN. QazAqparat – QR Prezıdenti Qasym-Jomart Toqaev jáne QR Premer-Mınıstri Asqar Mamınniń bergen tapsyrmasyn oryndaý maqsatynda QR Ádilet mınıstri Marat Beketaev Almaty oblysynda «Aýyl – el besigi» baǵdarlamasy aıasynda júzege asyrylyp jatqan jobalarmen tanysty, dep habarlaıdy QazAqparat.

Mınıstr Іle aýdanynyń Boraldaı, Kerbýlaq aýdanynyń Saryózek jáne Panfılov aýdanynyń Sarybel aýylynda bolyp, áleýmettik ınfraqurylymnyń jaı-kúıimen tanysyp shyqty. Atap aıtqanda, orta mektepke jasalǵan keshendi, balabaqsha men mádenıet úıiniń ǵımaratyna jasalǵan jóndeý jumystarynyń barysyn pysyqtady.

Budan basqa mınıstr Eskeldi aýdany Baqtybaı selosynda salynyp jatqan gaz qubyry men gaz bólý jelisiniń qurylysymen tanysty. Jumys sapary barysynda Marat Beketaev Uıǵyr aýdanyndaǵy jańa dene shynyqtyrý-saýyqtyrý kesheniniń qurylysyn kórip, Eńbekshiqazaq aýdany Masaq selosyndaǵy sý qubyry jelisiniń qaıta jóndelýin baqylap qaıtty. Jumys saparynyń qorytyndysy boıynsha Ádilet mınıstri oblys basshysymen birlese, áleýmettik jobalar iske asyp jatqan aýdan, selo ákimderiniń qatysýymen jınalys ótkizdi. Mınıstr atalǵan nysandardyń dál ýaqytynda bitýi qajet ekendigin nazarǵa saldy. Jalpy Almaty oblysynda 732 aýyldyq eldi meken bar, onyń 457-i áleýeti joǵary, jalpy halyq sany 1,5 mln adamdy quraıdy.

«Aýyl – el besigi» jobasynyń júzege asqan kezeńi 2019-2020 jyldary jalpy halyq sany 264 myńdy quraıtyn 25 aýyldyq eldi mekende somasy 19,8 mlrd teńgeni quraıtyn 75 joba júzege asqan. Budan basqa 2022 jylǵa 72 aýyldyq eldi mekende júzege asatyn somasy 21,7 mlrd teńgeni quraıtyn jobalar tizimi bekitildi.