Aýyl balasynyń Aıaz ataǵa jazǵan haty tańǵaldyrdy - Aqtóbe oblysy
ASTANA. QazAqparat - Aqtóbe oblysynda turatyn on jasar oqýshy Ilıa Mıneev Aıaz Ataǵa aýylynyń qys boıy qar basyp qalatyn jolyn tazartýǵa kómek berýin surapty, dep habarlady QazAqparat tilshisi.
Hatta «Aıaz ata, salamatsyz ba! Sizge shalǵaıdaǵy qar basyp jatqan Pıatıgor aýylynan jazyp otyrmyn. Qar basqan deıtin sebebim, bizge aq ulpanyń mol jaýǵandyǵy sondaı, qardan aıaq alyp júrý múmkin emes. Meniń synyptaǵy dostarymdy tyńdasam, senen bireýi oıynshyq mashına, endi bireýi qýyrshaq, táttiler surap jatyr. Al maǵan onyń eshqaısysy kerek emes. Óıtkeni, meniń ata-anam jaǵdaıymdy jasap otyr, olar - óte meıirimdi jandar. Meniń bir ǵana tilegim bar - bizge aýyldyń jolyn jaqsylap tazartyp berseńiz. Áıtpese, maǵan mektepke barý qıyn»,- dep jazypty 3-synyp oqýshysy.
Ilıa Mıneevtiń haty ustazdaryn da beı-jaı qaldyrmapty. Qobda aýdany Bestaý aýyldyq orta mektebiniń tárbıe isi jónindegi meńgerýshisi Shynar Sataevanyń aıtýynsha, bıyl mektep basshylyǵy bastaýysh synyp oqýshylaryna Aıaz ataǵa hat jazdyrýdy uıǵarypty.
- Balalardyń tilegi ártúrli. Bireýi qalam, oıynshyq surasa, endi bireýleri planshet suraǵan. Armandaǵan syılyqtardyń eń baǵalysy sol planshet bolar. Al biz Ilıa Mıneevtiń hatyn oqyp, shyny kerek, tańǵaldyq. Sebebi, bul sabaqtyń ústinde jazylǵan nárse bolǵandyqtan, oǵan eshqandaı ata anasynyń nemese muǵalimniń yqpaly bolǵan joq. Balanyń óziniń tilegi, armany», - deıdi Shynar Sataeva. Ustazynyń aıtýynsha, Ilıa - mektebiniń maqtanyshy, oqý ozaty.
Aıta ketsek, Bestaý aýyly oblys ortalyǵy - Aqtóbeden 95 shaqyrym jerde ornalasqan.
Zada Zeıin
