Aýyl balalary dári-dármek pen mamandardyń joqtyǵyna shaǵymdandy
ASTANA. QazAqparat - 2017 jyly Sandj ortalyǵy júrgizgen «Qazaqstan Respýblıkasyndaǵy balalar quqyǵyn qorǵaý salasyndaǵy ahýalǵa táýelsiz monıtorıng jáne taldaý» atty zertteý jumystarynyń aıasynda, balalar óz densaýlyqtaryna ózderi baǵa bergen bolatyn.
Jaýap bergen balalardyń orta eseppen 9,1 paıyzy jıi aýratyndaryn jetkizgen. Ásirese Mańǵystaý jáne Batys Qazaqstan oblysynyń balalary jıi aýyryp qalatyndaryn aıtqan. Al Qyzylorda jáne Ońtústik Qazaqstan oblystarynda balalar óz densaýlyqtarynyń myqty ekenin atap ótken. Sonymen birge shaǵyn jáne orta qalalarda turatyn perzentterimiz jıi aýramyz dep jaýap bergen.
Sondaı-aq olar medıtsınalyq qyzmetterge degen qoljetimdilikke baǵa berdi. Anyqtalǵandaı, balalardyń 5 paıyzy aýyrǵan kezde qajetti preparattarǵa qol jetkize almaıdy, dárigerdiń qabyldaýyna 4,5 paıyzy kire almaǵan, tıisti em-domdaryn (statsıonarlyq, sanatorlyq jáne taǵy basqa) qabyldamaǵany týraly 3 paıyzy aıtqan.
Aýyl balalary bolsa qajetti dári-dármekke qol jetkizýdiń qıyndyǵyna jáne medıtsınalyq mamandardyń joqtyǵyna shaǵymdanǵan.
Mańǵystaý oblysynda respondentterdiń jartysynan kóbi (53 paıyz) qajetti dári-dármektiń tapshylyǵyn aıtqan.
