«Aýyl amanaty» jobasy aıasynda eldi mekenderdiń halqy turaqty jumyspen qamtylady - Premer-Mınıstrdiń orynbasary
Jumys sapary barysynda Altaı Kólginov «Aýyl amanaty» jobasyna qatysýǵa nıetti óńir jurtshylyǵymen kezdesý ótkizdi.
«Bul Memleket basshysynyń saılaýdan keıingi aýyl turǵyndaryn qoldaýǵa arnalǵan alǵashqy Jarlyǵy. Osy joba aıasynda el boıynsha 100 mlrd teńge bólindi. Onyń ishinde Shyǵys Qazaqstan oblysyna 1,5 mlrd teńge jumyldyrylǵan. Jobanyń basty maqsaty – aýyl turǵyndaryn mal sharýashylyǵy, ósimdik, qus ósirýshi jáne basqa da salalardaǵy jumyspen qamtamasyz etý»,- dedi ol.
Jınalǵandar arasynan «Bul jobany qalada júzege asyrýǵa bola ma?» degen suraq qoıyldy. Vıtse-Premer baǵdarlamanyń aýyl turǵyndaryn qoldaýǵa arnalǵanyn, al qaladaǵy sharýashylyqtar úshin sýbsıdııalaýdyń basqa da tetikteri bar ekenin túsindirdi.
Kezdesýden keıin Premer-Mınıstrdiń orynbasary D.Serikbaev atyndaǵy ShQTÝ bazasynda jasaqtalǵan Lý Ban Tıantszın kásibı sheberhanasymen tanysty.
«Ótken jyly Qazaqstan men Qytaı Prezıdentteri arasynda elimizdegi joǵary oqý oryndarynyń birinde Lý Ban sheberhanasy ashylatyny týraly kelisim boldy. Qazir Tıantszın kásibı ınstıtýtymen osy jobany júzege asyryp jatyrmyz. Bul baǵdarlama óte tanymal, álemniń 20 elinde mundaı sheberhana bar. Al Qazaqstanda sheberhanany bizdiń ýnıversıtette ashý týraly sheshim qabyldandy. «Kólik, kólik tehnıkasy jáne tehnologııalar» bilim berý baǵdarlamasy boıynsha modýldik oqý jospary Qytaı ınstıtýtymen birlesip ázirlenip, oqý josparyna engiziletin bolady», - dedi ShQTÝ basqarma tóraǵasy Sáýle Rahmetýllına.
