«Aýyl amanaty» shaǵyn nesıesi kimderge beriledi

AQKÓL. QazAqparat – Elimizde sharýalardy qoldaýǵa arnalǵan qandaı qarjy baǵdarlamalary bar? Atalǵan saýalǵa Aýyl sharýashylyǵy mınıstriniń orynbasary Rústem Qurmanov jaýap berdi, dep habarlaıdy QazAqparat tilshisi.

«Bıyl aýyl sharýshylyǵyn qoldaýǵa bólingen 450 mlrd teńgeden bólek, qosymsha iri jobalardy qoldaýǵa baǵyttalyp 100 mlrd teńge qarjy bólindi. Onyń ishinde 65 sút fermasyn qurý bar. Qoldaý aıasynda fermerlerdiń 2,5% kredıtti 10 jylǵa alý múmkindigi bar. Odan bólek, «Aýyl amanaty» atty shaǵyn nesıe baǵdarlamasy iske qosylǵan. Oǵan da 100 mlrd teńge bólindi. Maqsat – aýyl turǵyndarynyń tabysyn arttyrý», - dedi Rústem Qurmanov Aqmola oblysynda ótip jatqan «Jańa Dala» mamandandyrylǵan kórmesinde.

Vıtse-mınıstrdiń málimdeýinshe, aýyl sharýashylyǵy - ekonomıkanyń lokomotıvi.

«Aýyl sharýashylyǵynyń odan ári damýy óndirýshiler men sharýalardyń zaman suranysyna beıimdelip, oǵan saı jumys isteı alýyna baılanysty. Ol degenimiz - tsıfrlandyrý, zamanaýı tehnologııaǵa kóshý jáne transformatsııa. Bizdiń mınıstrlik bıznes ortamen birlesip jumys istegisi keledi. Sol sııaqty otandyq aýyl sharýashylyǵy óndirisiniń básekelestigin arttyrý baǵytynda birlesip áreket etýge daıynbyz», - deıdi ol.

Buǵan deıin jemshóp, jemis-jıdek jáne kókónis ósirýshilerge arnalǵan 6% lızıng týraly habarlaǵan edik.

Aıta keteıik, búgin-erteń Aqmola oblysynda dástúrli «Jańa Dala/Green Day» dala kúni mamandandyrylǵan kórmesi ótip jatyr.