Aýyl amanaty: Batys Qazaqstan oblysynda ótinim qabyldaý toqtatyldy
«Aqjaiyq» áleýmettik-kásipkerlik korporatsııasy» AQ basqarma tóraǵasy Baqdáýlet Ibraımov málim etkenindeı, bıylǵy mamyr aıynan bastap oblysta mal jáne ósimdik sharýashylyǵyn, shaǵyn bıznesti damytýǵa, aýyl sharýashylyǵy kooperatıvterin jaraqtandyrýǵa, «Jasyl beldeý» jáne «Sút beldeýi» jobalaryna baǵyttalǵan «Aýyl amanaty» baǵdarlamasy júzege asyryla bastady.
Osy maqsatta respýblıkalyq bıýdjetten 6,4 mlrd teńge bólindi. «Aýyl amanaty» jobasy aýyl turǵyndaryna 5-7 jyl merzimge jyldyq 2,5 paıyz jeńildikpen nesıe alýǵa múmkindik beredi.
«Bizdiń oblys boıynsha qazirge deıin jalpy somasy 1 mlrd 852 mln teńgege 272 ótinim maquldandy. Qalǵan ótinimder qaralyp jatyr. Aqjaıyq, Terekti, Syrym, Kaztalov jáne Báıterek aýdandary turǵyndarynyń belsendiligin atap ótý kerek. Bul baǵdarlama – ósimdik pen mal sharýashylyǵynan basqa da aýyl sharýashylyǵy tehnıkasyna servıstik qyzmet kórsetý, jartylaı fabrıkattar óndirý, tigin tsehy sııaqty basqa da baǵyttardy damytýǵa jaqsy múmkindik», - dedi Baqdáýlet Ibraımov.
«Aqjaiyq» ÁKK» AQ-dan túsken málimetke qaraǵanda, Terekti aýdanynyń turǵyny Sarjan Ibatov alǵashqy bolyp jeńildikpen nesıe alyp, qatty turmystyq qaldyqtardy qaıta óńdeý kásibin ashty. Ol osy baǵdarlamanyń aıasynda qatty turmystyq qaldyqtardy jınaqtaý úshin arnaıy qurylǵy satyp alǵan. Plastıkten jasalǵan buıymdar, makýlatýra jáne basqa da turmystyq qaldyqtardy jınap, Oral qalasyna aparyp tapsyrady. Sondaı-aq, maldyń júnin óńdep, kórpe-jastyq tigý kásibin bastady.
Aıta keteıik, azamattardan túsken ótinimderdegi jalpy qarajat somasynyń oblysqa berilgen 6,4 mlrd teńgelik lımıtten asyp ketýine baılanysty kúni búgin «Aýyl amanaty» baǵdarlamasy boıynsha ótinimderdi qabyldaý toqtatyldy. Barlyq ótinimderdi qarap, nátıjesin shyǵarý tamyz aıynyń sońyna deıin aıaqtalady dep josparlanǵan.
