Aýyl amanaty: Atyraý oblysynda 80 ótinishtiń 10-y ǵana talapqa saı bolǵan
Atyraý oblysy ákiminiń orynbasary Marat Mýrzıevtiń tóraǵalyǵymen ótken jıynda «Aýyl amanaty» baǵdarlamasyn iske asyrý máselesi qaraldy.
«Atyraý» ÁKK» AQ basqarma tóraǵasynyń orynbasary Azamat Aıtpaevtyń málimetinshe, oblys ákimdigi, Aýyl sharýashylyǵy jáne Qarjy mınıstrlikteri arasynda úshjaqty kredıttik shartqa qol qoıylǵan.
«Atalǵan shartqa sáıkes aýyl turǵyndaryna shaǵyn nesıe berý úshin 1 mlrd 504 mln teńge bólindi. Kredıttik shart sheńberinde 188 shaǵyn nesıe berilip, 199 jańa jumys ornyn qurý kózdelip otyr. Áleýmettik-kásipkerlik korporatsııasynyń shotyna qarjy aýdaryldy. Korporatsııa shaǵyn nesıe berýge daıyn. «Aýyl amanaty» baǵdarlamasyna qatysý úshin 80 ótinish tústi. Alaıda, olardyń 10-y ǵana barlyq talapqa saı keledi. Qalǵan ótinish ıeleri qajetti qujattardy tolyqtyryp jatyr. Erejege sáıkes, kredıttik ótinim berý úshin 17 qujatty usyný qajet. Al ótinishterge 15 kún ishinde taldaý júrgizilip, sheshim shyǵarylady», - dep habarlady Azamat Aıtpaev.
Osyǵan baılanysty oblystyq Aýyl sharýashylyǵy basqarmasynyń basshysy Salaýat Óteǵulovqa baǵdarlamany iske asyrýdy júıeleý eskertildi. Sondaı-aq oǵan qatysý úshin 17 qujattyń tizimin azaıtý usynyldy.
«Bizdiń maqsatymyz – kásipkerlerge qoldaý kórsetý. Bul baǵdarlamaǵa qatysý úshin kóp qujatty tapsyrý jergilikti sharýa qojalyǵynyń ıeleri men kásipkerler úshin tıimsiz. Sondyqtan, qujattar tizimin jeńildetý qajet», -dedi Marat Mýrzıev.
Eske sala ketelik, budan buryn Atyraý oblysynyń ákimi Serik Shápkenov «Aýyl amanaty» baǵdarlamasy týraly turǵyndar áli bilmeıtinin aıtyp, quzyrly vedomstvolar jumysyn synǵa alǵan edi.
