Aýyl ákiminiń kómegimen trassada úsh eldiń azamattary qutqaryldy
AQTÓBE. QazAqparat – Aqtóbede Álimbet aýylynyń ákimi jolda qalǵan jolaýshylardy qutqarý úshin tótenshe jaǵdaılar qyzmetinen kómek surady, dep habarlaıdy QazAqparat tilshisi.
16 qańtar kúni saǵat 20:37-de Qarǵaly aýdanynyń órt sóndirý beketine Álimbet aýylynan habar túsken. Aýyl ákimi aýa raıyna baılanysty Aqtóbe – Orsk avtojoly jabylǵanyn, jolda kólikter qalyp qoıǵanyn aıtqan.
«Kólikter qar qursaýynda qalǵan. Oqıǵa ornyna 2 tehnıka men qutqarýshylar jiberildi. Aqtóbe-Orsk tasjolynda Ózbekstannyń 46 azamaty bar jolaýshylar avtobýsy jáne Reseı men Qazaqstannyń 5 kóligi toqtap qalǵan. Olarda 9 adam bolǵan. Aýyldyq okrýg ákimi joldy tazalaý jáne turyp qalǵan avtokólik jolaýshylaryn Álimbet orta mektebi men dámhanaǵa ornalastyrý týraly sheshim qabyldady. Jolaýshylar jylytý pýnktinde tamaqpen, jatyn orynmen qamtamasyz etildi», - dep habarlady oblystyq TJD baspasóz qyzmetinen.
Aıta keteıik, búgin trassalar ashylyp, jolaýshylar óz baǵyttary boıynsha joldaryn jalǵastyrdy.
