«Aýyl ákimin saılaý shildede bastalady» - BAQ-qa sholý
***
«Egemen Qazaqstan» basylymynyń búgingi sanynda Prezıdent Nursultan Nazarbaevtyń Jarlyqtary jarııalandy. Onda Úkimet quramyndaǵy birqatar aýys-túıister men taǵaıyndaýlar qamtylyp otyr. Mınıstrler kabınetindegi ózgerister jaıynda tolyq bilgińiz kelse gazettiń búgingi sanyn qarap shyǵyńyz.
Osy basylymda «Aýyr qylmys azaıǵany atap aıtyldy» atty materıal berilgen. Onda keshe Memleket basshysy Nursultan Nazarbaevtyń Qazaqstan Respýblıkasynyń Bas prokýrory Ashat Daýylbaevty qabyldaǵany jaıly jazylǵan.
A.Daýylbaev Qazaqstan Prezıdentine quqyq qorǵaý organdarynyń 2012 jylǵy qyzmeti, Memleket basshysynyń azamattardyń quqyǵy men bostandyǵyn qorǵaýdy kúsheıtý, qoǵamdyq-saıası turaqtylyqty qoldaý jónindegi tapsyrmalarynyń oryndalýy týraly baıandady, sondaı-aq eldi eleńdetken qylmystyq isterdi tergeý barysynan habardar etti. Nursultan Nazarbaev júrgizilgen attestatsııa quqyq qorǵaý organdary qyzmetkerleriniń kásibı deńgeıi men jaýapkershiligin arttyrýǵa múmkindik bergenine toqtaldy. Kezdesý barysynda Memleket basshysy bultartpas jazalaýdy qamtamasyz etýge jáne qylmystardy ashýǵa erekshe kóńil bólý qajettigin atap kórsetti. Osyǵan baılanysty Qazaqstan Prezıdenti barlyq qabyldanǵan sharalar, jalpy alǵanda, eldegi krımınogendik jaǵdaıdy jaqsartýǵa kómektesetinin atap ótti.
***
«Orda» tobynyń ánshisi Erbolat Bedelhan «Tyıym salynǵan bıler» atty fılm túsirdi. Atalmysh týyndy búginnen bastap otandyq kınoteatrlarda kórsetile bastaıdy»,-dep jazady «Aıqyn basylymy. Bul - el aldynda án salyp, bı bılep júrgen Erbolat Bedelhannyń rejısser retindegi alǵashqy qoltańbasy. Sondyqtan jańa eńbek sapaly deńgeıde jaryq kórýi úshin «Orda Brothers» kompanııasy men «Jado Productions» prodıýserlik ortalyǵy birigip ter tókken. Daıyndyq sharalaryna bir jyldan astam ýaqyt jumsalǵan. Al túsirý alańyndaǵy jumys 24 kúnge sozylypty. Bir aıǵa jýyq «Orda» tobynyń ánshileri el aldynda óner kórsetýdi toqtata turǵan. Sóıtip, elimizde buryn-sońdy qolǵa alynbaǵan jobany ómirge ákelgen. Birden aıta keteıik, bul fılm - Qazaqstan kınoındýstrııasy men shoý-bıznes salasyndaǵy bıge qyzyǵatyn, bıdi ózine ómirlik serik sanaıtyn jastarǵa arnalǵan alǵashqy kıno kartına. Fılm rejısseri Erbolat Bedelhannyń aıtýy boıynsha, bı bıleý - áýesqoılyq qana emes, sonymen qatar ózińdi-óziń qalyptastyrý, salaýatty ómir saltyn ustaný jolyndaǵy úlken eńbek. Bul maqala «Tyıym salynǵan bıler» atty taqyryppen kópshilik nazaryna usynylyp otyr.
«Aıqyn» gazetinde «Aýyl ákimin saılaý shildede bastalady» degen taqyryppen maqala jarııalandy. «Ótken jyldyń kóleminde Prezıdent ákimshiligine elimizdegi túrli memlekettik organdardyń qyzmeti men ondaǵy jaýapty tulǵalarǵa qatysty 20 myńdaı aryz túsipti. Shaǵymdardyń basym bóligi memlekettik qyzmetkerlerdiń zańǵa qatysty saýatynyń tómendigimen baılanysty eken. Eger úlken úmit kútilgen ákimshiliktik reforma tıimdi túrde júrgizilse, keleńsizdikterdiń kemıtindigine senim bar. Bul jaıynda keshe Astanada aýdan, qala ákimderimen jáne tıisti vedomstvo jetekshilerimen ótkizilgen jıyn barysynda QR Prezıdenti Ákimshiligi basshysynyń orynbasary Baýyrjan Baıbek aıtty»,-dep jazady basylym.
***
«Alash aınasy» gazetiniń búgingi sanyndaǵy bas maqala «Qutydaǵy qulynshaqqa telmirip qalmaımyz ba?» dep atalady. Onda búgingi demografııalyq kórsetkishimizdiń tómendep, elimizde bala týý sanynyń azaıyp bara jatqandyǵy aıtylady. Buǵan qosa beleń alǵan bedeýliktiń kesirinen qoldan uryqtandyrýǵa júginetin áıelderdiń de sany ósip bara jatqandyǵy jóninde másele kóterilgen. Atalǵan problema tóńireginde tıisti mamandardyń oı-pikirleri men naqty usynystary keltirilgen.
Osy basylymda kóterilgen taǵy bir mańyzdy másele el rýhyn kóteretin patrıottyq ánder tóńireginde órbigen. «Patrıottyq ánder jańarmaı tur» dep atalatyn oıtúrtki maqalada, keıingi kezde ulttyq mýzyka salasynda jeńil-jelpi, toı ánderiniń kóptep jazylyp, kerisinshe ultjandylyq, patrıottyq sezimderdi ushtaıtyn jańa ánderdiń óte azdyǵy týraly aıtylǵan.
