Aýyl ákimi paıda tabý maqsatynda memlekettik qyzmet pen jeke kásipkerlikti birge atqaryp kelgen - Prokýratýra
ASTANA. 19 shilde. QazAqparat /Qanat Mámetqazyuly/ - Ońtústik Qazaqstan oblysynyń prokýratýrasy jergilikti atqarýshy, ishki ister, tótenshe jaǵdaılar, salyq jáne ádilet organdarynda sybaılas jemqorlyqqa qarsy kúreste qoldanyp jatqan sharalardyń tolyqtyǵyna tekserý júrgizdi.
Sonyń nátıjesinde QR «Sybaılas jemqorlyqqa qarsy kúres» týraly Zańynyń 10 babynda kózdelgen memlekettik qyzmetkerlerge belgilengen shekteýlerdi Saıram aýdany Qaramurt aýylynyń ákimi S.Rejametov 2001 jylǵy 25 maýsynan beri buzyp, salyq organynda kásipker retinde tirkelip memlekettik fýnktsııalardy oryndaýmen baılanyspaıtyn kásipkerlik qyzmetpen aınalysqany anyqtaldy. Bul týraly QR Bas prokýratýrasynyń baspasóz qyzmetinen habarlandy.
Aýyl ákimi salyq organynda kásipker retinde tirkelip uzaq jyl boıy esepte turǵany tek osy tekserý barysynda prokýratýramen anyqtalǵan. Al aýdandyq salyq basqarmasy, aýdan ákimdiginiń kadr nemese zań qyzmeti bul jaǵdaılardy anyqtaýǵa múldem shara qabyldamaǵan. Osyǵan oraı, oblys prokýratýrasymen zań buzýshylyqty joıý týraly usynys engizildi. Ony qaraý barysynda memlekettik qyzmet pen jeke kásipkerlikti qosa atqarǵan saıası memlekettik qyzmetkerdiń budan bólek taǵy bir qylmysy áshkerelendi. «Ákim Qyzylsý aýylyndaǵy mádenıet úıiniń ǵımaratyna aǵymdaǵy jóndeý jumystaryn júrgizip jatqan «Monolıt-21» JShS-niń dırektory E.Ýtepovten avanstyq tólem jasaý úshin 200 myń teńge kóleminde para alý ústinde ustalyp, qazirgi tańda tergeý amaldary júrgizilýde», - delingen prokýratýranyń baspasóz qyzmeti taratqan aqparda.
