Aýyl ákimi enesiniń toıhanasyn bıýdjet esebinen jylytyp kelgen
QARAǴANDY. QazAqparat - Qyzmet babyn asyra paıdalanǵan Aqtoǵaı aýdany Qyzylaraı aýylynyń ákimi Sheker Tólepbergenovanyń isi tekserilip jatyr. Ol óziniń enesiniń ıeligindegi toıhananyń kommýnaldyq shyǵyndaryn bıýdjet esebinen tólep kelgen.
Ol eki jyldan beri ǵımarattyń jylý aqysyn memleket esebinen jaýyp otyrǵan. Atalǵan iske baılanysty oblystyq Memlekettik qyzmet isteri jáne sybaılas jemqorlyqqa qarsy is qımyl departamentiniń mamandary tekserý jumystyryn júrgizdi. Tekseris nátıjesin Ádep jónindegi keńes otyrysynda departamenttiń ókili Baqtııar Mákeev málimdedi.
«Toıhana Sheker Tólepbergenovanyń enesi bolyp keletin kásipker Ahmetovaǵa tıesili ekendigi anyqtaldy. 2015-2017 jyldar aralyǵynda okrýg ákimi toıhana ıesimen kommýnaldyq qyzmetterdi usyný jóninde kelisimshart jasaspaǵan», - dedi Baqtııar Mákeev.
Toıhana zaly ákimdik ǵımaratynda ornalasqan jáne onyń aýmaǵy 353 sharshy metrdi quraıdy. Kásipker ákimshilik ǵımarattyń bir bóligin 10 jylǵa senimgerlik basqarý negizinde alǵan. 2015 jyly ǵımaratqa bıýdjet qarjysynan jylytý qazandyǵy salyndy. Ákimniń enesi oǵan zańsyz túrde qosylyp otyr.
Memlekettik qyzmet isteri jáne sybaılas jemqorlyqqa qarsy is qımyl departamentiniń basshysy Jandos Sársenovtyń tóraǵalyǵymen ótken Ádep jónindegi keńes músheleri aýyl ákiminiń jemqorlyq áreketin qatań synǵa aldy.
Jıynǵa qatysqan aýyl sheneýnigi óz kinásin tolyq moıyndaıtynyn málimdep, óz qyzmetinde qaldyrýyn ótindi. Sheker Tólepbergenovany qyzmetine tolyq sáıkes emes dep taný túrindegi jaýapkershilikke tartý úshin joǵary turǵan basshylyq, naqty aıtqanda Aqtoǵaı aýdanynyń ákimine usynys joldaý biraýyzdan uıǵaryldy.
Qazir bıýdjetke keltirilgen shyǵynnyń kólemi eseptelip jatyr. Endi kásipkerge barlyq shyǵyndy óteýge týra keledi.
