Aýyl ákimi áleýmettik jelide ózine til tıgizgenderdi sotqa berdi

PAVLODAR. QazAqparat - Pavlodar aýdany Grıgorevka aýyldyq okrýginiń ákimi Vıtalıı Brýtskıı áleýmettik jelilerde ózine til tıgizgenderdi sotqa berdi, dep habarlaıdy QazAqparat Pavlodarnews.kz saıtyna silteme jasap.

Vıtalıı Brýtskııdiń aıtýynsha, Instagram paraqshalarynyń birinde ol óziniń dosyna 18 gektar jer rásimdegeni týraly vıdeo jarııalanǵan. Bul ýchaske azamattardyń shaǵymy boıynsha tekserilgeni aıtylǵan. Onyń aýmaǵy «tazalanbaǵan, qazanshuńqyr, qabyrshaq, qubyrlar qaldyrylǵan».
Avtor atalǵan postqa óńirlik sybaılas jemqorlyqqa qarsy qyzmetke, prokýratýra men oblys ákimine nazar aýdarýdy suraǵan. Onyń sózinshe, eger másele sheshilmese, Prezıdentke júginedi.
Alaıda, aýyldyq okrýg basshysy V.Brýtskıı taratylǵan aqparatty joqqa shyǵardy.

Budan bólek, Vıtalıı Brýtskııdiń atyna ózge bir azamat qorlyq sózder joldaǵan. Máselen, «Depýtatqa suraq» WhatsApp-chatynda er adam aýyl ákimin áreketsizdik úshin aıyptap, daýystyq habarlama jibergen.
Grıgorevka aýyldyq okrýginiń ákimi Vıtalıı Brýtskıı sotqa aryzdanyp, onda Instagram jáne WhatsApp-ta taratylǵan óziniń ar-namysy men qadir-qasıetine nuqsan keltiretin aqparatty shyndyqqa sáıkes kelmeıdi dep tanýdy, sondaı-aq eki jaýapkerden bul aqparatty joqqa shyǵarýdy mindetteýdi surady. Sondaı-aq moraldyq zııan úshin ekeýinen de 500 myń teńgeden óndirip alýdy talap etti.
Jaýapkerlerdiń birine qatysty isti Pavlodar qalalyq soty qaraýǵa kiristi.