Aýyl ákimdiginiń ǵımaraty órtendi
ASTANA. QazAqparat - Aqmola oblysyna qarasty Shoıyndykól aýyldyq ákimdiginiń ǵımaraty órtendi. Bul týraly QR ІІM Tótenshe jaǵdaılar komıtetiniń resmı ókili Nursultan Nurahmetov aıtty, dep habarlaıdy QazAqparat.
Resmı ókildiń málimetinshe, 30 qarasha kúni tańǵy saǵat 04-54-te órtke qarsy qyzmet kezekshiligine Aqmola oblysyna qarasty Jarqaıyń aýdany Shoıyndykól aýyldyq ákimdiginiń ǵımaraty órtenip jatyr degen aqparat túsken. 120 sharshy metrlik turǵyn úıden ákimdikke aınalǵan ǵımarattyń shatyry órtengen.
«Saǵat 8-30-da órttiń aldy alynyp, 08-45-te tolyq óshirildi. Oqıǵa ornyna eń jaqyn 140 shaqyrym jerdegi Aqmola oblystyq TJD órt sóndirý qyzmetiniń 6 mamany men 2 tehnıkasy bardy. Sonymen qatar, órtti sóndirýge órtke qarsy erikti jasaqtyń 6 mamany men 2 tehnıkasy da jumyldyryldy», - dedi Nursultan Nurahmetov.
Aldyn ala málimetterge qaraǵanda, órt elektr kabelderiniń qysqa tuıyqtalýynan bolǵan. Oqıǵadan qaza tapqandar men zardap shekkender joq.
