Aýyl ákimderin tikeleı saılaý sheshimderdiń sapasy men tıimdiligin jaqsartady - sarapshy
«Jan-jaqty maǵynada alyp qarar bolsaq, saılaý saılaýshylarynyń múddesin bildirip, olardyń atynan sheshim qabyldaıtyn laýazymdy tulǵany jáne depýtatty saılaý quraly ekendigi belgili. Osydan-aq aýyl ákimderin saılaý aýyl turǵyndaryn jergilikti aýmaqtardy basqarýǵa tartý jáne oǵan qatysýyn keńeıtýdiń negizgi tetigi ekendigin baıqaýǵa bolady. Degenmen, Qazaqstanda aýyl ákimderin saılaý memlekettik basqarýdy ortalyqsyzdandyrý jáne jergilikti ózin ózi basqarý men jergilikti demokratııa ınstıtýttaryn kúndelikti tájirıbege engizýde mańyzdy baǵyttardyń biri bolyp qala beredi», - dedi ol QazAqparat tilshisine bergen suqbatynda.
Sarapshynyń atap ótýinshe, búginde Qazaqstandaǵy aýyl turǵyndarynyń úlesi el azamattary sanynyń shamamen 40 paıyzyn quraıdy. Búginde olardyń múddesin aýyl ákimderin tikeleı saılaýǵa deıin tek aýdandyq depýtattar ǵana bildirip keldi. Osy rette buǵan deıin aýyl ákimderi aýdandyq depýtattardyń-saılaýshylardyń janama saılaýy arqyly taǵaıyndalyp kelgendigin atap ótken jón. Demek, elimizde sońǵy 20 jyl boıy aýyl ákimderin janama saılaý tájirıbesiniń bar ekendigin eskerer bolsaq, endigi ýaqytta olar tikeleı saılaýǵa negizi bar deýge bolady.
«Aýyl ákimderin tikeleı saılaýdan kútiletin nátıje retinde jergilikti jerlerde qabyldanatyn sheshimderdiń sapasy men tıimdiliginiń arta túsetindigin aıtýǵa bolady. Oǵan eki faktor septigin tıgizedi. Birinshiden, qabyldanatyn sheshim árbir aýyldyń qajettiligine baılanysty júzege asyrylady. Qazaqstanda bir-birimen aıyrmashalyǵy bar 2 myńnan astam aýyl bar jáne aýyl ákimderin tikeleı saılaý ınstıtýty olardy basqarýda biregeı ádis qalyptastyrýǵa septigin tıgizedi. Ekinshiden, aýyl basshysynyń kelesi merzimge qaıta saılanýy saılaýshylarǵa, ıaǵnı naqty aýyl turǵyndary tarapynan qoldaýǵa baılanysty. Degenmen, turǵyndar da óz ókilettikterin saılanatyn ákimge berý arqaly jasaǵan tańdaýy úshin jaýapkershilik arqalaıtyndyǵyn bilýi tıis», - dedi Janar Sanhaeva.
