Aýyl ákimderin saılaý: «Partııalyq emes baıqaý ortalyǵy» baıqaýshylardy daıarlap jatyr
«Partııalyq emes baıqaý ortalyǵynyń» qyzmeti saılaýǵa, onyń ishinde saılaý ýchaskelerinde baqylaý men monıtorıng júrgizýge baǵyttalǵan. Qazirgi ýaqytta uıymnyń barlyq oblystarda fılıaldary bar jáne uıym memlekettik deńgeıdegi saılaý kezeńinde saıası, ekonomıkalyq, áleýmettik jáne mádenı quqyqtar men bostandyqtardy iske asyrýǵa jáne qorǵaýǵa nıetti.
Tólegen Kúnádilovtyń aıtýynsha, uıym aldaǵy aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderiniń saılaýyna belsene qatysady.
«Saılaýdy baıqaýda tájirıbesi bar azamattar birigip, «Partııalyq emes baıqaý ortalyǵy» respýblıkalyq qoǵamdyq birlestigin qurýdy uıǵardy. Bizdiń maqsatymyz – qatań saıası beıtaraptyq tanytý. Eshqandaı partııa ókiline, esh úmitkerge basymdyq bermeıdi. Olar saılaý komıssııasynyń jumysyna kedergi jasamaı, zań sheńberinde ótýine yqpal tıgizedi, buzýshylyqtardy baqylaý, tirkeý jáne ádil saılaý ótkizýge kómektesedi», - dep atap ótti T. Kúnádilov.
Buǵan deıin partııalyq emes baqylaý ortalyǵy Azamattyq alıans pen Kásipodaqtar federatsııasynan birikken jarııalanbaǵan organ bolatyn. Endi bul ortalyqty jeke zańdy tulǵa retinde tirkeý uıǵaryldy, ol baqylaýshy retinde saılaý protsesin maqsatty túrde qadaǵalaı bastaıdy.
«Biz ózimizdiń is-áreket algorıtmimizdi, ar-namys kodeksin ázirlep jatyrmyz. Baqylaýshylar qandaı da bir kandıdatqa nemese saıası partııaǵa beıtarap bolýǵa jáne saılaý protsesiniń ótýine kedergi keltirmeýge tıis», - deıdi spıker.
Sonymen birge, saılaý protsesin baqylaý eki kezeńnen turady: uzaq merzimdi jáne qysqa merzimdi. Uzaq merzimdi kezeńde saılaýǵa deıingi baqylaý: kandıdattarǵa teń múmkindikter berile me, buzýshylyqtar joq pa, múgedektigi bar adamdarǵa kandıdatqa daýys berý múmkindigi bar ma degen suraqtar qaralady. Al qysqa merzimdi kezeńde saılaý kúni tańerteńnen keshke deıin baqylaýshylar protsesti tolyǵymen baqylaıdy.
Eske sala keteıik, 25 shildede bir mezgilde 700-den astam aýyl ákimderin saılaýy ótedi. Aýdandyq mańyzy bar qalalardyń, aýyldardyń, kentterdiń, aýyldyq okrýgterdiń qalǵan ákimderin saılaý olardyń ókilettik merzimi aıaqtalǵan soń ótkiziledi.
