Aýyl ákimderin halyqtyń saılaý múmkindigi: Senat zań jobasyn keri qaıtardy
ASTANA. QazAqparat - Parlament Senatynyń jalpy otyrysynda «Qazaqstan Respýblıkasynyń keıbir konstıtýtsııalyq zańdaryna ózgerister men tolyqtyrýlar engizý týraly» Konstıtýtsııalyq zańynyń jobasy qaraldy, dep habarlaıdy QazAqparat tilshisi.
Zań jobasyn talqylaý barysynda ózgerister engizý qajettigi týyndady. ıAǵnı salystyrmaly kesteni qarastyrý kezinde aýyl ákimderin tóte saılaýdy engizýge qatysty normany alyp tastaýǵa qoldaý jasaldy.
Atap aıtqanda, osyǵan deıin zań jobasynda aýyldyq deńgeıdegi ákimderdi tikeleı saılaý eskerilgen bolatyn. Osy oraıda ákim jergilikti turǵyndarmen jalpyǵa birdeı teń tóte saılaý quqyǵy negizinde jasyryn daýys berý arqyly tórt jyl merzimge saılanatyny qarastyrylǵan edi.
Senattyń jalpy otyrysynda baıandama jasaǵan depýtat Vladımır Volkov túzetýler laýazymǵa saılaýdyń jáne laýazymnan bosatýdyń qoldanystaǵy tártibin saqtaý qajettigine baılanysty engizilgenin atap ótti.
Talqylaýdan keıin senatorlar zań jobasyn engizilgen túzetýlermen Májilis qaraýyna baǵyttaý sheshimin qabyldady.
Sonymen qatar, búgin zańnamalyq aktilerge saılaý máseleleri boıynsha ózgerister engizý týraly ilespe zań jobasy eki oqylymda qaraldy. Talqylaý barysynda engizilgen túzetýlerge qatysty senatorlar bul qujatty da Májiliske baǵyttady.
