Aýyl ákimderin halyq saılaıtyn bolady – zań jobasy
ASTANA. QazAqparat - Parlament Májilisiniń jalpy otyrysynda palata depýtattary «Qazaqstan Respýblıkasynyń saılaý týraly» QR Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasyn maquldady, dep habarlaıdy QazAqparat.
«Májilis depýtattaryn saılaýda qoldanylatyn barabar saılaý júıesin barlyq deńgeıdegi máslıhattar depýtattaryn saılaý tártibine taratý usynylady. Máslıhattar depýtattaryn saılaý protsesin jetildirýge baılanysty aýdandyq saılaý komıssııalaryn joıý usynylady. Olardyń qyzmetteri men ókilettikteri aýmaqtyq saılaý komıssııalaryna beriledi. Olardyń eki múshesi ózderiniń ókilettikterin turaqty kásibı negizde júzege asyrady», - dedi Ádilet mınıstri Marat Beketaev zań jobasy boıynsha baıandamasynda.
Sonymen qatar, M. Beketaev aýyldyq deńgeıdegi ákimderdi tikeleı saılaý engiziletinin atap ótti. Ákim jergilikti turǵyndarmen jalpyǵa birdeı teń tóte saılaý quqyǵy negizinde jasyryn daýys berý arqyly tórt jyl merzimge saılanady.
Budan bólek, jeke tulǵalar týraly memlekettik derekter bazasyn ıntegratsııalaý arqyly saılaýshylardyń tizimderin qurastyrý tártibin qaıta qaraý usynylady.
«Bul respýblıkalyq elektrondyq saılaýshylar tizimin qalyptastyrýǵa múmkindik beredi. Budan basqa, saılaý aldyndaǵy úgit júrgizý máselelerin sheshýge baǵyttalǵan túzetýler bar», - dedi Ádilet mınıstr.
