Aýyl ákimderi jasyryn daýys berý arqyly saılanýy múmkin
ASTANA. QazAqparat - Elimizde aldaǵy ýaqytta aýyl ákimderi halyqtyń jasyryn daýys berýi arqyly saılanýy múmkin. Bul jaıly Májiliste saılaý týraly zań jobasy talqylanǵan "dóńgelek ústelde" Ulttyq ekonomıka vıtse-mınıstri Aıbatyr Jumaǵulov aıtty, dep habarlaıdy QazAqparat tilshisi.
Aıta ketsek, Búgin Parlament Májilisinde ótken dóńgelek ústelde saılaý týraly zań jobasy talqylandy. Naqtyraq aıtqanda, jıynda «Qazaqstan Respýblıkasyndaǵy saılaý týraly» Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasy jáne «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» Zań jobasy qaraldy.
Zań jobasyn tanystyrǵan Ulttyq ekonomıka vıtse-mınıstri Aıbatyr Jumaǵulov usynylyp otyrǵan ózgerister negizinde aýyl ákimderin saılaýdyń tyń formaty engizilgeli jatqanyn aıtty.
«Aýyldyq okrýgterdiń ákimderin saılaý boıynsha qazirgi júıede birqatar másele bar. Eń birinshiden, úmitkerlerdi tańdaýdaǵy talqylaýdyń bolmaýy, halyqtyń saılaýǵa yqpal ete almaýy. Ekinshiden, aýyl ákimderi jıi aýysyp jatady. Basym jaǵdaıda 4 jylǵa saılanǵan ákim atalǵan merzim aıaqtalǵannan keıin basqa laýazymǵa taǵaıyndalyp ketedi. ıAǵnı, ol taǵy 4 jyl aýyldy basqaratyndaı jigerlendirý tetikteri joq. Kadrǵa baılanysty bul máseleni Májilistiń de, Senattyń da qabyrǵasynda kótergen bolatynbyz», - dedi vıtse-mınıstr.
Aýyldy basqarýdy yntalandyrý tetikterin qalyptastyrý úshin zań sheńberinde saılaý quqyǵy qaǵıdattary boıynsha tikeleı saılaý júrgizý usynylýda.
«Úmitkerlerdi ákimshilik-aýmaqtyq birliktegi halyqtyń jasyryn daýys berýi arqyly saılaıtyn bolady. Aýyl ákiminiń laýazymynyń tanymaldyǵyn arttyrý maqsatynda zań jobasy boıynsha, 4 jyl ákim bolǵannan keıin aýyl ákimine irikteý nemese konkýrs júrgizbeı-aq «B» korpýsyndaǵy ákimshilik laýazymǵa taǵaıyndala alatyndaı múmkindik berý kózdelgen. Aıta keterligi, aýyl ákimderin tikeleı saılaý ınstıtýty Germanııa, Shveıtsarııa, Kanada, Polsha sekildi elderde óziniń tıimdiligin kórsetip otyrǵanyn atap ótkim keledi», - dedi Aıbatyr Jumaǵulov.
foto: thumbs.vol.at
