Aýyl ákimderi saılaýyn ótkizetin kún áli túpkilikti anyqtalǵan joq - OSK

ASTANA. 13 naýryz. QazAqparat - Aýyl ákimderi saılaýyn ótkizetin kún áli túpkilikti anyqtalǵan joq. Bul týraly búgin QR Ortalyq saılaý komıssııasynda ótken brıfıngte komıssııanyń bas sarapshysy, saıasattaný ǵylymdarynyń doktory, professor Venera Jeksembekova málim etti.

«Memleket basshysynyń tapsyrmasyna sáıkes 2013 jyldyń qyrkúıeginen keshiktirilmeı elimizde aýdandyq mańyzdaǵy qalalardyń, aýyldyq okýrgterdiń, aýyldyq okrýg quramyna kirmeıtin kentter men aýyldardyń ákimderin tıisti máslıhattar arqyly saılaý uıymdastyryp ótkizilýi tıis», - dedi ol.

V.Jeksembekovanyń atap ótýinshe, kandıdattardy usynýdy aýdan ákimi jergilikti qoǵamdastyqpen keńese otyryp, balama negizde júzege asyrady. Al osy saılaý naýqanyn bastaý merzimi áli túpkilikti anyqtalǵan joq. Qazirgi ýaqytta tıisti ázirlik jumystary júrgizilýde.

Aýyl ákimderin saılaý demokratııalyq qaıta qurýdyń jalǵasy bolyp tabylatyn mańyzdy qadam ekendigin basa aıtqan ol: «Shamamen 2500 ákim saılanýy tıis. Bul barlyq deńgeıdegi ákimderdiń jalpy sanynyń 90 paıyzyn quraıdy», - dedi.