Aýyl ákimderi karantın týraly sheshimdi 3 kún ishinde shyǵarýy tıis
TARAZ. QazAqparat - Qazaqstan Respýblıkasynyń aýyl ákimderine veterınardyń maldan aýrý tabylǵany jónindegi qorytyndysynan keıin úsh kún ishinde karantın týraly sheshim qabyldaýy tıis bolady, dep habarlaıdy «QazAqparat» HAA tilshisi.
Jambyl oblysyndaǵy aýyldardyń biriniń ákimi veterınardyń iri qaradan aýrý tabylǵany jónindegi qorytyndysynan keıin eki jarym aı ótkennen soń ǵana karantın engizgen bolatyn. Osy oqıǵaǵa baılanysty Qazaqstan Respýblıkasynyń osy saladaǵy zańnamasyna tıisti ózgertýlerdi engizýdiń qajettiligi jaıyndaǵy másele kóterildi.
«Qoldanystaǵy zańnamalyq aktilerdiń eshbirinde aýyl ákiminiń karantın engizý týraly sheshim qabyldaıtyn ýaqytyn belgileıtin merzim kórsetilmegeni anyqtaldy. Ekinshi sózben aıtqanda, aýyl ákimi munymen eshqandaı zańbuzýshylyq áreketin jasamaǵan. Alaıda osy kezeń barysynda aýrý iri qaranyń adam densaýlyǵyna zııandy eti erkin saýda aınalymyna shyǵarylýy múmkin ǵoı. Al bul, óz kezeginde, aýrýdyń odan ary taralýyna ákep soqtyratyny tabıǵı jaıt», - deıdi Jambyl oblystyq Kásipkerler palatasynyń basshysy Shýhrat Hashımov «QazAqparat» HAA tilshisine bergen suhbatynda.
Sonyń nátıjesinde Jambyl oblystyq Kásipkerler palatasy osy jaǵdaıǵa Ulttyq palatanyń nazaryn aýdardy. Ulttyq palata osy máseleni ózekti máseleler tizilimine engizip, Qazaqstan Respýblıkasynyń Aýyl sharýashylyǵy mınıstrligine júgindi. Aýyl sharýashylyǵy mınıstrligindegiler ony maquldady. Qazir Qazaqstan Respýblıkasynyń zańnamasyna tıisti ózgertýler engizý protsedýrasy júrip jatyr. «Josparǵa oraı, aldaǵy ýaqytta aýyl ákimderi joǵarydaǵy sekildi jaǵdaılarda úsh jumys kúni ishinde karantın engizý týraly sheshim qabyldaýǵa mindettelýi múmkin», - dep málimdedi Jambyl oblystyq Kásipkerler palatasynyń baspasóz qyzmetinen.
«Aǵymdaǵy jyly Qazaqstan Respýblıkasynyń «Atameken» Ulttyq kásipkerler palatasy ózekti máseleler tizimine elimiz kásipkerleriniń bastamasymen 138 másele engizildi. Sonyń 27-si Jambyl oblystyq óńirlik palatasynyń kúsh salýymen sheshimin tapty nemese sheshimin tabý qarsańynda tur. Sondaı máselelerdiń birin Jambyl palatasy engizdi. Búgingi tańda sol osy túıtkil boıynsha ýákiletti organ oń sheshim shyǵarýǵa kelisim berdi», - deıdi Jambyl oblystyq Kásipkerler palatasynyń basshysy Shýhrat Hashımov.
