Aýyl ákimderi bir lotpen qyrýar aqshaǵa taýar men qyzmetterdi satyp alady
ASTANA. QazAqparat - Memlekettik satyp alýlar aıasynda bir kompanııadan satyp alynatyn taýar men qyzmetterdiń shekti baǵasy kóteriledi. QR Qarjy vıtse-mınıstri Rýslan Beketaevtiń aıtýynsha, atalǵan ózgeristerdiń arqasynda jumystyń da, taýardyń da sapasyn kóterýge bolady, dep xabarlaıdy QazAqparat tilshisi.
"Zań jobasy aıasynda bir arnadan satyp alynatyn taýar men qyzmetterdiń shekti somasyn 100 mınımaldy eseptik kórsetkishten 500-ge deıin arttyrý josparlanǵan. Al aýyl ákimdikteri úshin shekti soma 3000 mınımaldy eseptik kórsetkishke deıin kóteriledi. Shyny kerek, búginde aýyldyq jerde biliktiliktiń deńgeıi joǵary emes. Degenmen, jańa normanyń arqasynda jergilikti bılik ózine júktelgen mindetti tolyǵymen oryndaı alady", - dedi R. Beketaev búgin QR Parlament Májilisinde tıisti zań jobasyn tanystyrý kezinde.
Osy oraıda QR Qarjy mınıstrligi memlekettik satyp alý departamentiniń dırektory Sábıt Axmetov jańa normanyń tıimdiligin túsindirip berdi. "Búginde memlekettik satyp alýlar aıasyndaǵy taýar men qyzmettrge qatysty syn jıi aıtylady. Ondaı problema bar. Bizde barlyǵy tómen baǵa bergennen keıin sapa odan da tómen bolady. Sondyqtan aýyldyq jerdegi ákimder úshin taýar men qyzmetterdi satyp alýdyń eń tómengi somasyn 100 mınımaldy eseptik kórsetkishten, ıaǵnı 240 000 teńgeden 1 200 000-ge deıin kóterip otyrmyz. Demek, qandaı da bir zat 1,2 mln teńgeden aspaıtyn bolsa, jaqsy ári sapaly zattardy satyp alýǵa múmkindik bolady", - dep atap kórsetti S.Axmetov jýrnalısterge bergen suxbatynda.
