Aýyl adamdary koronavırýs juqtyrǵan naýqastar men dárigerlerge 1000 lıtr qymyz ákeldi

SEMEI. QazAqparat – Semeıde qaıyrymdylyq aktsııasy aıasynda Abaı aýdany turǵyndary medıtsına qyzmetkerleri men koronavırýs ınfektsııasyn juqtyrǵan naýqastarǵa qymyz ákeldi, dep habarlaıdy QazAqparat tilshisi qalalyq aqparat ortalyǵyna silteme jasap.

Osyndaı qıyn kezeńde kún saıyn qaýipti vırýspen kúresip jatqan medıtsına qyzmetkerleri men COVID-19 juqtyrǵan naýqastarǵa Sarjal aýylynyń turǵyndary qoldaý kórsetken. Ortalyq meshit aldynda volonter-kásipkerler jınalyp aktsııa bastady. Oǵan aýyl turǵyndary da qosylyp, nátıjesinde 1000 lıtr qymyz jınalǵan.

«Aýylymyzdyń turǵyndary birigip, qymyz jınady. Aktsııaǵa shamamen 90 adam qatysqan. Barlyǵy múmkindiginshe qymyz bergen. Bireýler 10 lıtr qossa, keıbiri odan kóbirek sýsynyn syıǵa tartqan. Adamdar syrqattanyp jatqan qıyn kezeńde biz olarǵa qoldaý kórseteıik dep sheshtik. Óıtkeni qymyz adam aǵzasyna óte paıdaly jáne túrli aýrýdy emdeýde qoldanylady», deıdi aktsııaǵa qatysýshylardyń biri, kásipker – Methat Mýsın.

Jınalǵan qymyz barlyq qalalyq aýrýhanalarǵa jiberiledi. Semeı aýdanynyń bas ımamy Asqar Ábitaıulynyń aıtýynsha, qymyz mindetti túrde dárigerler men naýqastardyń ımmýnıtetin kóterýge kómektesedi.

«Qazir elimizde «Ómirge úmit syıla» - «Podarı nadejdý na jızn» aktsııasy ótip jatyr. Aktsııa aıasynda aýrýhanalarǵa dári-dármek pen basqa da qajetti zattar jetkizilýde. Qazir dárigerler men ınfektsııaǵa shaldyqqandardyń ımmýnıtetin kóterý úshin Sarjal aýylynyń turǵyndary jınaǵan qymyzdy taratyp jatyrmyz. Qymyz – turǵyndardyń polıgon kezinde de aman qalýyna kómektesken erekshe, tipti qasıetti sýsyn deýge bolady. Qymyzdy qalalyq aýrýhanalarǵa tegin taratamyz. Osyndaı aktsııalar jalǵasyn tabady dep senemiz», - dep tolyqtyrdy ımam.