Aýtızmi bar balalarmen jumysqa arnalǵan kitaptar qazaq tilinde shyǵarylmaq
Olardyń qatarynda doktor Dj. Partıngtonnyń (AQSh) «ABLLS-R» jeke baǵdarlamalaryn qurastyrý boıynsha daǵdylardy baǵalaý quraly men nusqaýlyǵy jáne ıÝ. Erts pen O. Meleshkevıchtiń (Izraıl, AQSh) «Erekshe balalar. Minez-qulyqty qoldanbaly taldaýǵa kirispe» kitaby bar.
Eske sala keteıik, bolashaqtyqtardyń bastamasymen qurylǵan «Bolashaq» qoryna bıyl 10 jyl toldy. Osy jyldar ishinde bolashaqtyqtar fılmderdi memlekettik tilge dýblıajdaıtyn belgili jobamen qatar, kóptegen áleýmettik jáne qaıyrymdylyq bastamalardy iske asyrdy. Solardyń biri – «Árbir bala mektepke barýǵa laıyq» ınklıýzıvti bilim berýdi damytý jobasy.
Qordyń málimetinshe, jobany bolashaqtyqtar «Nur Otan» partııasynyń qoldaýymen, Qazaqstanda ınklıýzıvti bilim berý modelin qurý jáne engizý maqsatynda júzege asyrýda. Negizgi baǵyty – ınklıýzııany qoldaý kabınetterin ashý, qazaqstandyq mamandardy erekshe balalardy súıemeldeýdiń halyqaralyq tájirıbelerine oqytý, kásibı ádebıetti qazaq tiline aýdarý.
Jobanyń ereksheligi – minez-qulyq mamandarynyń mektepterge úzdiksiz ádistemelik qoldaý kórsetýi. Mundaı qoldaý qajettiligi aýtızmmen aýyratyn balalardyń damý erekshelikterimen jáne qazaqstandyq mamandardyń biliktilik deńgeıiniń jetkiliksizdigimen baılanysty.
Aýtızmge shaldyqqan balalar – erekshe bilim berýdi qajet etetin balalardyń arasyndaǵy eń kúrdeli sanattarynyń biri – bul minez-qulyqtarynda kemistikteri bar balalar. Búginde mektepter men balabaqshalar olardy oqytýǵa daıyn emes. Pedagogtar men tárbıeshiler, defektologııa fakýltetteriniń túlekteri osyndaı balalardy túsinýge jáne oqytýǵa kómektesetin ádistemelerdi meńgermegen. Aýtızm jáne aýtıstik belgileri bar balalar sóıleı, basqalarmen qarym-qatynas jasaı almaýy, kúndelikti tapsyrmalardy oryndaı almaýy múmkin. Degenmen, der kezinde durys qarym-qatynas jasap, tilin taba bilgen jaǵdaıda olar tez úırenedi jáne mundaı balalardy jalpy ortada oqytsa, daǵdylary aıtarlyqtaı jaqsy qalyptasady.
Búginde «Bolashaq» qory elimizdiń 17 óńirinde 43 ınklıýzııany qoldaý kabınetin ashty. Olardyń arasynda elordadaǵy eki balabaqsha da bar. Aýtızm jáne basqa da aqyl-oı kemistigi bar 600-den astam bala kún saıyn mektepke barýǵa múmkindik aldy. Sondaı-aq bolashaqtyqtar Nursultan Nazarbaev qoryna ınklıýzııany qoldaý boıynsha taǵy 16 kabınet ashýǵa jan-jaqty sarapshylyq qoldaý kórsetti. Qazirgi ýaqytta atalǵan kabınetter «Bolashaq» qorynyń kýratorlyǵymen jumys isteýde.
Qamqorshylyq keńesiniń jetekshisi Dınara Shaıjúnisovanyń aıtýynsha, Qazaqstanda minez-qulyq mamandarynyń kadrlyq rezervin qurý maqsatynda «Bolashaq» qory qazaqstandyq mamandardy sheteldik minez-qulyq sarapshylarynan turaqty túrde oqytyp, sýpervızııadan ótkizip turady.
Qor erekshe bilim berilýine qajettiligi bar balalarmen jumys isteıtin mamandar úshin Qazaqstandaǵy alǵashqy «Erekshe bilim berilýine qajettiligi bar balalardy minez-qulqyna qoldanbaly taldaý ádisterin paıdalana otyryp psıhologııalyq-pedagogıkalyq súıemeldeý (AVA-terapııa)» biregeı biliktilikti arttyrý kýrsyn ázirlep, iske qosty. Atalǵan kýrs QR Bilim jáne ǵylym mınıstrligi saraptamalyq keńesi maquldaǵan AVA-terapııa boıynsha biliktilikti arttyrýdyń Qazaqstandaǵy alǵashqy kýrsy boldy. 10 qarashada «Bolashaq» qory kýrsqa avtorlyq quqyq aldy.
«Búginde elimizde 15-ke jýyq minez-qulyq mamandary jumys istese, olardyń 10-y Qordyń mamandary. 40-tan astam mektep mamandary Qor qarajaty esebinen halyqaralyq deńgeıdegi uzaq merzimdi sertıfıkattaý kýrstarynda oqýda. 2022 jyldyń kókteminde «Bolashaq» qory minez-qulyqty qoldanbaly taldaý boıynsha qazaq tiline aýdarylǵan alǵashqy kitaptardy shyǵarýdy josparlap otyr. Olar: doktor Dj. Partıngtonnyń (AQSh) «ABLLS-R» jeke baǵdarlamalaryn qurastyrý boıynsha daǵdylardy baǵalaý quraly men nusqaýlyǵy jáne ıÝ. Erts pen O. Meleshkevıchtiń (Izraıl, AQSh) «Erekshe balalar. Minez-qulyqty qoldanbaly taldaýǵa kirispe» kitaby», - dedi Dınara Shaıjúnisova.
Aıta keteıik, «Árbir bala mektepke barýǵa laıyq» jobasy aıasynda balalarǵa kórsetiletin qyzmetter qaıyrymdylyq qarajaty esebinen aqysyz negizde usynylady.
