Aýtızmge shaldyqqan balany qoǵamǵa beıimdep, boıyndaǵy qabiletin ashý kerek - maman

TALDYQORǴAN. QazAqparat - 2 sáýir - Dúnıejúzilik aýtızm týraly aqparat taratý kúnine oraı taldyqorǵandyq analar bas qosyp, óz oılaryn ortaǵa saldy. Oblys ortalyǵynda qurylǵan «Ózge ómir» atty qoǵamdyq uıymda 60-tan astam balanyń anasy toptasqan, dep habarlaıdy QazAqparat tilshisi.

Aýtızm dertine shaldyqqan balalar Almaty oblysynda da az emes. «Ózge ómir» qoǵamdyq birlestiginiń málimetinshe, óńirde ondaı balalar sany az emes. Oblystyq bilim basqarmasynda 250-ge jýyq bala tirkelse, densaýlyq saqtaý basqarmasynda 80-ge jýyq bala esepte tur. Al jumyspen qamtý bólimderiniń tiziminde aýtızm dertine shaldyqqan 40-tan astam bala ǵana bar.

«Bul kórsetkish odan da kóp bolýy múmkin» deıdi qoǵamdyq qor jetekshisi jáne quryltaıshysy Kamılla Sıtasmanova. Sebebi atalǵan memlekettik mekemelerdiń balalardyń qujatyn rásimdeý parametri ártúrli. Sondaı-aq kóptegen ata-ana balasynyń dertin jasyryp qalǵysy keledi.

«Kerisinshe, balany qoǵamǵa beıimdep, boıyndaǵy qabiletin ashýǵa jaǵdaı jasaýymyz qajet» degen uıym jetekshileri basqa analardy da birigýge shaqyrdy. Kamılla Sıtasmanovanyń aıtýynsha, tek birigip qana ananyń ıyǵyna túsken aýyrtpalyqty jeńildetýge bolady.