Aýtızm men psıhıkalyq aýytqýlary bar balalarǵa arnalǵan 8 ortalyq ashylady
Májilistiń jalpy otyrysynda QR Premer-Mınıstriniń orynbasary Eraly Toǵjanov osyndaı málimet berdi.
«Biz kúnkóris deńgeıi kedeılik sheginen tómen otbasylarǵa ataýly áleýmettik kómek kórsetemiz. Búginde osyndaı kómekti 95 myń otbasy alyp otyr.
2020 jyly azamattardyń talap-tilekteri eskerile otyryp ataýly kómekti taǵaıyndaý mehanızmi ózgertilip, 25 tabys túri men áleýmettik tólem alynyp tastaldy.
Kómek alýshylardy eńbekke yntalandyrý tásilderi engizildi. Eger eńbekke qabiletti azamattar usynylǵan jumystan bas tartsa, ataýly kómek 6 aıǵa toqtatylady. Bul ataýly áleýmettik kómektiń masyldyqqa aınalýyn boldyrmaýǵa baǵyttalǵan. Sondyqtan ataýly áleýmettik kómekti basqa járdemaqylarmen salystyrýǵa bolmaıdy», - dedi Eraly Toǵjanov Parlament Májilisiniń jalpy otyrysynda.
Sondaı-aq, ol muqtaj azamattarǵa proaktıvti formatta kómek kórsetý úshin memlekettik organdardyń 20 tsıfrlyq qosymshasyn ıntegratsııalaý arqyly Otbasynyń tsıfrlyq kartasy ázirlenetinin aıtty.
«Múgedektigi bar adamdardy ońaltý qyzmetimen qamtamasyz etý maqsatynda 2021-2023 jyldary respýblıkalyq bıýdjet esebinen 12 ońaltý ortalyǵyn salý josparlanǵan, onyń 5-eýiniń qurylysy byltyr bastaldy.
Sondaı-aq, «Qamqorlyq» jobasy aıasynda aýtızmmen syrqat jáne basqa da psıhıkalyq aýytqýlary bar balalarǵa arnalǵan 8 kúndizgi ortalyq ashý josparlanýda. Osyndaı 17 ortalyq byltyr ashylyp, qoldanysqa berildi», - dedi vıtse-Premer.
Sondaı-aq, Eraly Toǵjanov Májilis depýtattaryna ınflııatsııany tejeý baǵytyndaǵy sharalar týraly málimet berdi.
Onyń málimeti boıynsha, bıyl zeınetaqy men járdemaqyny ındeksteýge qosymsha 111 mlrd teńge bólinedi.
