Aýtızm dıagnozy bar balany urǵan: Qyzylordada damytý ortalyǵy qyzmetkeriniń isi qaralyp jatyr
QYZYLORDA. KAZINFORM – Qyzylorda qalasynyń turǵyny aýtızm dıagnozy qoıylǵan qyzyn qaladaǵy damytý ortalyǵynyń qyzmetkeri urǵanyn aıtyp, dabyl qaqty.
- Aýtızmi bar qyzym biraz ýaqyttan beri damytý ortalyǵyna baryp júrgen edi. Ár ata-ana sııaqty men de balamdy sol jerge senip tapsyrdym. Biraq kúni keshe kútpegen jaǵdaıǵa tap boldym. Ortalyq basshysy maǵan baıqaýsyzda balama sabaq ótip jatqan vıdeo jiberdi. Men de ashyp úlgerdim. Sol vıdeony kórgen kezde júregim toqtap qala jazdady. Tili shyqpaǵan, sóıleı almaıdy dep erekshe balamdy bir aı boıy uryp kelgen. Qyzym ózin-ózi qorǵaı almaıdy, bizge aıtyp keletin tili joq, ursa da qyzym kózi móldirep qarap otyr. Quqyq qorǵaý organdarynan, bilim basqarmasynan, balalardyń quqyqtaryn qorǵaý jónindegi ýákilden jáne basqa da quzyrly mekemelerden osy iske shuǵyl nazar aýdaryp, zań aıasynda tıisti shara qoldanýdy suraımyn, - dedi Raýshan Orynbaı beıneúndeýde .
Kazinform tilshisiniń osy máselege baılanysty saýalyna Qyzylorda oblystyq polıtsııa departamenti túsinik berdi.
- Kámeletke tolmaǵan adamdy tárbıeleý jónindegi mindetterdi tıisinshe oryndamaý deregine qatysty qylmystyq is qozǵaldy. Qazirgi ýaqytta qajetti tergeý áreketteri júrgizilip jatyr. Onyń ishinde polıtsııa beınejazbalardy zertteý ústinde. Oblystyq bilim basqarmasyna tıisti usynys engizildi, - delingen resmı jaýapta.
Buǵan deıin Almatyda balalardy túzeý ortalyǵynyń qyzmetkeri erekshe balanyń qolyn buraǵany úshin qamaýǵa alyndy.
