Aýtızmi bar balalarǵa aýrýhanaǵa jatpaı-aq ońalýǵa múmkindik jasalady
ASTANA. KAZINFORM — Qazaqstanda psıhıkalyq densaýlyq salasyndaǵy kómek kórsetý jelisin keńeıtý josparlanyp otyr. Atap aıtqanda, 81 bastapqy ortalyq pen 189 aýtızmi bar balalarǵa arnalǵan kúndizgi bolý bólimshesin ashý kózdelip otyr.
Bul erte dıagnostıkalaý, emdeý jáne ońaltý qyzmetteriniń qoljetimdiligin, onyń ishinde aýyl turǵyndary úshin de arttyrýǵa múmkindik beredi. Bul týraly vedomstvoda ótken keńeste QR Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Gúlnar Sársenbaeva málimdedi.
Ol Halyqtyń psıhıkalyq densaýlyǵyn saqtaýdyń 2027–2031 jyldarǵa arnalǵan keshendi josparynyń jobasyn tanystyrdy. Qujat 11 baǵyt boıynsha 60 is-sharany qamtıdy.
QR Densaýlyq saqtaý mınıstrliginiń Ulttyq psıhıkalyq densaýlyq ortalyǵynyń basshysy Álııa Rústemova óńirlik 20 psıhıkalyq densaýlyq ortalyǵyna júrgizilgen monıtorıng nátıjeleri týraly baıandady.
— Búginde psıhıkalyq densaýlyq máseleleri erekshe mańyzǵa ıe. Bizdiń mindetimiz — patsıenttiń turǵylyqty jerine qaramastan, elimizdiń barlyq óńirinde mamandandyrylǵan kómektiń qoljetimdiligin qamtamasyz etý, — dep atap ótti Densaýlyq saqtaý mınıstri Aqmaral Álnazarova.
Qazirelimizde 20 psıhıkalyq densaýlyq ortalyǵy, 101 bastapqy ortalyq jáne 212 beıindi kabınet jumys isteıdi. Sonymen qatar 12 óńirde qosymsha 81 bastapqy ortalyq ashý qajettiligi aıqyndaldy. Aýtızm spektriniń buzylystary bar balalarǵa erekshe kóńil bólinbek. Osy maqsatta psıhıkalyq densaýlyq ortalyqtary men aýdandyq aýrýhanalar bazasynda 189 kúndizgi bolý bólimshesin ashý kózdelgen. Bul táýlik boıy statsıonarǵa jatqyzbaı-aq, balalardy ońaltý múmkindikterin keńeıtýge múmkindik beredi. Mınıstr qyzmettiń kadrlyq áleýetin nyǵaıtýdy, ásirese balalar men eresekterdiń psıhıatrııasy baǵyttarynda mamandarmen qamtamasyz etýdi kúsheıtýdi tapsyrdy. Sondaı-aq mamandardy áleýmettik qoldaýdyń qosymsha sharalaryn qarastyrýdy mindettedi.
— Kadr tapshylyǵy áli de negizgi máselelerdiń biri bolyp otyr. Mamandar daıarlaýdy keńeıtý, onyń ishinde jergilikti atqarýshy organdardyń bilim berý granttary esebinen oqytý kólemin arttyrý jáne medıtsına qyzmetkerlerin áleýmettik qoldaýdyń qosymsha sharalaryn qarastyrý qajet, — dedi mınıstr.
Keshendi jospar jobasynda medıtsınalyq uıymdardy jańǵyrtý, jabdyqtardy jańartý, ambýlatorııalyq kómekti damytý jáne dárilik zattarmen qamtamasyz etý júıesin jetildirý de kózdelgen. Psıhıkalyq densaýlyq salasynda buzylystardy erte anyqtaýdan bastap emdeý, ońaltý jáne áleýmettik qoldaýǵa deıingi kómektiń qoljetimdi ári úzdiksiz júıesin qalyptastyrý basty basymdyq dop qalady.
Budan buryn Astana áýejaıy aýtızm spektrindegi balalarǵa beıimdelgen qyzmet engizgenin jazdyq.
