Aýsyl aýrýynyń anyqtalýyna baılanysty Reseı Federatsııasynyń Qazaqstanǵa qoıǵan shekteýi karantın alynǵannan keıin de 1 jyl kúshinde bolady
ASTANA. Maýsymnyń 21-i. QazAqparat /Gúlmıra Álıakparova/ - Aýsyl aýrýynyń anyqtalýyna baılanysty Reseı Federatsııasy Qazaqstannan tiri maldar men mal ónimderin jetkizýge tyıym saldy.
Qazaqstan shekteý merzimi aıaqtalǵannan keıin de, 12 aı boıy óz ónimderin Reseı aýmaǵyna jetkizýge quqyǵy bolmaıdy. Bul týraly búgin jýrnalısterge bergen suhbatynda QR Aýyl sharýashylyǵy mınıstrligi Agroónerkásip keshenindegi memlekettik ınspektsııa komıteti basqarmasynyń bastyǵy Aqyn Yspulaev málim etti.
«Maýsymnyń 18-i kúni Reseıdiń aýyl sharýashylyǵyndaǵy qadaǵalaý qyzmeti (RAShQQ) Aqmola oblysy Ereımentaý aýdany Novodolınsk aýylynda anyqtalǵan indet týraly tolyq aqparat berý týraly QR Aýyl sharýashylyǵy mınıstrligi Agroónerkásip keshenindegi memlekettik ınspektsııa komıtetine hat túsirdi. Bul hatqa Aýyl sharýashylyǵy mınıstrigi búgin tıisti jaýabyn berdi», - dep atap ótti ol.
Sondaı-aq onyń aıtýynsha, RAShQQ-tyń ótinishi boıynsha aýrý anyqtalǵan eldi mekennen maldardan tıisti patologııalyq materıaldar alynyp, olar Reseıdiń Vladımır qalasyndaǵy Janýarlardy qorǵaý ǵylymı-zertteý ınstıtýtyna jiberiletin bolady. Sebebi, bul Instıtýt - Shyǵys Eýropa, Ortalyq Azııa jáne Kavkaz mańy elderi boıynsha aýsyl aýrýyna qatysty Halyqaralyq Epızootıkalyq bıýronyń - aýmaqtyq referenttik zerthana dárejesine ıe.
Budan bylaı, Qazaqstan aýsyl juqpasy anyqtalǵan Aqmola oblysynda tekserý jáne zertteý jumystaryn RAShQQ-pen birlesip júzege asyratyn bolady. Al aýrýdyń shyǵý sebebin anyqtaý, juqpa kózin tabý jáne onyń oshaǵyn joıý sharalary aıaqtalǵanǵa deıin RF aýmaǵyna Qazaqstannan mal jáne onyń ónimderi jetkizýge tyıym salyndy. «Bul ýaqytsha shara. Biraq Halyqaralyq epıdemıologııalyq bıýronyń usynysy boıynsha shekteý merzimi - karantın alynǵannan keıingi 12 aıǵa deıin óz kúshinde bolady», - dedi ol.
Aıta keteıik, sońǵy úsh jylda Aqmola oblysynan Reseıge mal ónimderi jetkizilmeıdi. Sondyqtan bul shekteý jartylaı fabrıkattar eksporttap otyrǵan Qostanaı, Mańǵystaý jáne Soltústik Qazaqstan oblystaryna aýyr tıeri anyq.
