Aýstrııanyń Lınts qalasynda Qazaqstan konsýldyǵy ashyldy
ASTANA. QazAqparat - Lınts qalasynda Joǵarǵy Aýstrııa federaldy jerinde qyzmet kórsetetin Qazaqstan Respýblıkasynyń Qurmetti konsýldyǵynyń ashylý saltanaty ótti. Onyń ashylý rásimine jergilikti úkimet jáne parlament músheleri, óńirdiń isker jáne mádenı ortasynyń, konsýldyq korpýstyń, sondaı-aq buqaralyq aqparat quraldyrynyń ókilderi qatysty, dep habarlaıdy QR SІM baspasóz qyzmeti.
Qazaqstannyń Aýstrııadaǵy Elshisi Qaırat Sarybaı jańa Qurmetti konsýl Frıdrıh Floımaırge konsýldyq patentti jáne Qazaqstan Respýblıkasynyń týyn tabys etip, qazaqstandyq-aýstrııalyq yntymaqtastyqty keńeıtý jolynda sáttilikter tiledi. Qazaqstandyq dıplomat Pavlodar oblysy men Joǵarǵy Aýstrııa arasyndaǵy ornatylǵan áriptestiktiń zor múmkinshilikterine nazar aýdardy. Osyǵan oraı ol aýstrııalyq tarapty ózara áreketterdiń ár túrli salalaryndaǵy áleýetti barynsha belsendi damytýǵa shaqyrdy.
Joǵarǵy Aýstrııa federaldy jer Úkimetiniń mınıstri Maks Hıgelsberger Lınts qalasynda Qazaqstan Respýblıkasy ókildiginiń qurylýyn quptap, atalǵan federaldy jerdiń Qazaqstan óńirleri, sonyń ishinde Pavlodar oblysymen yntymaqtastyq ornatýǵa qyzyǵýshylyǵyn atap ótti. Ol jergilikti kásipkerlerdi Qurmetti konsýldyqtyń múmkinshilikterin jańa baılanystar ornatýǵa jáne birlesken jobalardy júzege asyrýda paıdalana otyryp, Qazaqstanmen keńirek tanysýǵa shaqyrdy.
Joǵarǵy Aýstrııa federaldy jerindegi Parlamenttiń 3-shi prezıdenti Gerta Vaıksler-Haýer Qazaqstan ókildiginiń eki memlekettiń iskerler, bilim jáne mádenı ortalary arasyndaǵy baılanys kópir retindegi tájirıbelik mańyzdylyǵyn aıtty.
Sol óńirdiń ataqty kásipkeri, Qazaqstan Respýblıkasynyń Qurmetti konsýly Frıdrıh Floımaır joǵary senim bildirgenine alǵysyn bildire otyryp, eki eldiń arasynda dostyq qarym-qatynasty nyǵaıtýǵa barlyq kúshin salatynyn aıtty.
Іs-shara aıasynda Qazaqstan Respýblıkasynyń Aýstrııadaǵy Elshiligi tarapynan júrgizip jatqan «Qazaq Іnjýleri - Uly Dala caryny» jobasy sheńberinde Aýstrııanyń joǵarǵy oqý oryndarynda bilim alyp júrgen Qazaqstan Respýblıkasynyń jas mýzykanttarynyń kontserti uıymdastyryldy. Qatysýshylar álemdik klassıkalyq mýzyka men belgili qazaq kompozıtorlarynyń týyndylaryn zor iltıpatpen qarsy aldy.
Ekijaqty qarym-qatynastardy odan ári damytý mánmátininde Joǵarǵy Aýstrııamen yntymaqtastyqty damytýǵa úlken mańyz beriledi. Aýstrııanyń soltústiginde ornalasqan Joǵarǵy Aýstrııada avtomobıl ónerkásibi jáne mashına jasaý, metallýrgııa, hımııa, óndiristi plastıkter, qaǵaz, óńdeý ónerkásibiniń, basqa da salalary damyǵan. Aýstrııa óndirisindegi barlyq ónerkásiptiń úshten biri Joǵarǵy Aýstrııaǵa tıesili.
