Aýstrııanyń Syrtqy ister mınıstri Astanaǵa resmı saparmen keldi
ASTANA. KAZINFORM — Aýstrııa Respýblıkasynyń Eýropa jáne halyqaralyq ister jónindegi federaldyq mınıstri Beate Maınl-Raızınger resmı saparmen Astanaǵa keldi. Sapar aıasynda ol Qazaqstannyń Syrtqy ister mınıstri Ermek Kósherbaevpen kezdesti.
Taraptar keńeıtilgen quramda kelissózder ótkizip, ekijaqty yntymaqtastyqtyń damý qarqynyn talqylady. Ermek Kósherbaev Qazaqstan men Aýstrııanyń 30 jyldan astam ýaqyt boıy berik ekijaqty qatynastardy saqtap kele jatqanyn aıtty.
— Sizdiń resmı saparyńyz uzaqmerzimdi ekijaqty áriptestikti nyǵaıtýdaǵy mańyzdy qadam sanalady. Bul saıası dıalogymyzǵa, Venamen jáne basqa da halyqaralyq uıymdarmen yntymaqtastyǵymyzǵa jańa serpin berýge jaqsy múmkindik týǵyzady. Qazaqstan men Aýstrııa 30 jyldan astam ýaqyt buryn — 1992 jyldyń aqpanynda dıplomatııalyq qatynastar ornatqan. Búginde biz ózara senimge, ortaq múddelerge jáne praktıkalyq yntymaqtastyqqa negizdelgen naqty, mazmundy ári syndarly dıalogty kórip otyrmyz, — dedi Ermek Kósherbaev QR Syrtqy ister mınıstrliginde ótken kezdesýde.
Sondaı-aq mınıstr Qazaqstan Aýstrııany mańyzdy eýropalyq áriptes retinde qarastyratynyn jáne yntymaqtastyqty ekijaqty ári kópjaqty formatta odan ári damytýǵa nıetti ekenin jetkizdi.
Óz kezeginde Beate Maınl-Raızınger bul sapar buryn qol jetkizilgen kelisimderdiń jalǵasy ekenin atap ótti.
— Sizdi qaıta kórgenime qýanyshtymyn. Siz Venaǵa kelgende men Qazaqstanǵa kelýge ýáde berip edim, sol ýádemdi oryndadym. Bizdiń yntymaqtastyǵymyz óte jaqsy baǵytta damyp keledi, al meniń Іshki ister mınıstrimen birge kelýim Aýstrııanyń ekijaqty qatynastardy qanshalyqty joǵary baǵalaıtynyn kórsetedi, — dedi aýstrııalyq dıplomat.
Onyń aıtýynsha, dıplomatııalyq pasport ıeleri úshin vızasyz rejımniń engizilýi jáne aýstrııalyq bıznes delegatsııasynyń kelýi Qazaqstanmen yntymaqtastyqqa qyzyǵýshylyqtyń artyp kele jatqanyn, sonyń ishinde ınvestıtsııalar men ınfraqurylymdyq jobalarǵa, ásirese Orta dáliz aıasynda qatysýǵa nıetti ekenin bildiredi.
Beate Maınl-Raızınger óz sózinde taraptar energetıkalyq qaýipsizdik máselelerin de talqylaǵanyn atap ótti. Onyń aıtýynsha, Aýstrııa ásirese energetıkalyq resýrstar jetkizý salasynda Qazaqstanmen áriptestikti joǵary baǵalaıdy.
Buǵan deıin Qazaqstan men Aýstrııa arasyndaǵy zańsyz júrgen adamdardy readmıssııalaý jáne tranzıtteý týraly kelisim ratıfıkatsııalanǵan edi.
Byltyr Aýstrııa Respýblıkasy Federaldyq Parlamenti Ulttyq keńesiniń ekinshi prezıdenti Peter Haýbner Astanaǵa kelgen edi.
