Aýstrııadaǵy Qazaqstan azamattaryn readmıssııalaý tártibi aıqyndaldy — zań
ASTANA. KAZINFORM — Búgin Májilistiń jalpy otyrysynda «Qazaqstan Úkimeti men Aýstrııa Úkimeti arasyndaǵy zańsyz júrgen adamdardy readmıssııalaý jáne tranzıtteý týraly kelisimdi ratıfıkatsııalaý týraly» Zań qabyldandy.
Atalǵan kelisimge 2025 jylǵy 28 aqpanda Astanada qol qoıyldy. Qujattyń negizgi maqsaty — ulttyq zańnama talaptaryn buza otyryp, memleketter aýmaǵynda júrgen adamdardy readmıssııalaý jáne tranzıtteý salasyndaǵy eki el arasyndaǵy yntymaqtastyqtyń quqyqtyq negizin qurý.
Іshki ister mınıstriniń orynbasary Sanjar Ádilovtiń aıtýynsha, kelisim el aýmaǵynda bolý sharttaryn buzǵan nemese zańsyz kirgen adamdardy óz eline qaıtarýdy kózdeıdi. Sonymen qatar qıyn jaǵdaıǵa tap bolǵan, ıaǵnı qujattaryn jaǵaltqan adamdarǵa da qoldanylady. Readmıssııa boıynsha qaıtarylǵan azamattarǵa ákimshilik aıyppul nemese memleketten shyǵarý sııaqty sanktsııalardy qoldanbaıdy. Qazirgi kezde readmıssııa ınstıtýty 21 elmen belsendi túrde júzege asyrylyp keledi.
Májilistiń Zańnama jáne sot-quqyqtyq reforma komıtetiniń málimetine qaraǵanda, kelisimde zańsyz kóship-qonýshylardy jáne taraptardyń biriniń aýmaǵynda bolý nemese turý sharttaryn buzǵan adamdardy qandaı merzimde qaıtaratyny týraly naqty qaǵıdalar belgilenedi. Kelisimde eki eldiń azamattaryn ǵana emes, sondaı-aq úshinshi elderdiń azamattary men azamattyǵy joq adamdardy qabyldaý, berý jáne tranzıtteý rásimderinde birlesip áreket etý tártibi aıqyndalady.
Aıta keteıik, jaqynda Prezıdent Qasym-Jomart Toqaev Qazaqstan men Frantsııa arasyndaǵy adamdardy readmıssııalaý týraly zańǵa qol qoıdy.