Aýstrııadaǵy Qazaqstan azamattaryn qaıtarý tártibi jeńildeıdi — Senat
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Aýstrııa Úkimeti arasyndaǵy zańsyz júrgen adamdardy readmıssııalaý jáne tranzıtteý týraly kelisimdi ratıfıkatsııalaý týraly» Zań maquldandy.
2025 jylǵy 28 aqpanda Astana qalasynda qol qoıylǵan bul Kelisim zańsyz kóshi-qonǵa jáne transshekaralyq uıymdasqan qylmysqa qarsy is-qımyl salasyndaǵy halyqaralyq yntymaqtastyqty damytýǵa, sondaı-aq azamattardyń quqyqtaryn qamtamasyz etýge baǵyttalǵan mańyzdy qadam.
- Qujat eki eldiń aýmaǵyna kelý jáne bolý sharttaryna sáıkes kelmeıtin nemese sáıkes kelmeı qalǵan adamdardy anyqtaý men qaýipsiz ári belgilengen tártippen qaıtarý boıynsha tıimdi rásimderdi qalyptastyrýǵa baǵyttalǵan. Atap aıtqanda, úshinshi memleketterdiń azamattaryn olardyń azamattyǵy bar elge, al azamattyǵy joq adamdardy sońǵy ýaqytta turaqty turǵan nemese olarǵa jol júrý qujatyn bergen memleketke qaıtarý qaǵıdaty bekitilgen. Sonymen qatar, readmıssııa týraly suraý salýdyń mazmunyna qoıylatyn talaptar, ony joldaý tártibi men qaraý merzimderi, qaıtarýǵa jatatyn adamdardy tasymaldaý sharttary men tásilderi belgilengen. Tasymaldaý áýe jáne jerústi kóligin qosa alǵanda, kez kelgen kólik túrimen júzege asyrylýy múmkin, - dedi senator Murat Qadyrbek.
Munymen qosa, qujat derbes derekterdiń qaýipsizdigin qamtamasyz etýge baǵyttalǵan qatań kepildikterdi kózdeıdi, onyń ishinde ruqsatsyz nemese zańsyz óńdeýden, sondaı-aq baıqaýsyzda joǵalýdan, joıylýdan nemese zaqymdanýdan qorǵaý sharalary qarastyrylǵan. Sonymen birge, readmıssııa rásimderine baılanysty taraptardyń qarjylyq mindettemeleri, sonyń ishinde kólik jáne tranzıtteýge arnalǵan shyǵyndardy bólý, daýlardy retteý tártibi, sondaı-aq Kelisimniń kúshine enýi men qoldanylýyn toqtatý sharttary aıqyndalǵan.
- Qate readmıssııalaý jaǵdaılaryna erekshe nazar aýdarylǵan - mundaı jaǵdaıda azamattardyń quqyqtaryn buzbaı rásimderdi túzetý tetigi kózdelgen. Kelisimdi iske asyrý úshin quzyretti organdar retinde Qazaqstan Respýblıkasy Іshki ister mınıstrligi jáne Aýstrııa Respýblıkasynyń Federaldyq ishki ister mınıstrliginiń Immıgratsııa jáne pana berý jónindegi federaldyq vedomstvosy aıqyndalǵan. Kelisimdi ratıfıkatsııalaý eki memlekettiń quzyretti organdarynyń jedel ári qaýipsiz ózara is-qımyly úshin quqyqtyq negiz qalyptastyryp, zańsyz kóshi-qonnyń aldyn alý tetikterin nyǵaıtady jáne zańsyz júrgen adamdardy readmıssııalaý men tranzıtteý rásimderiniń tıimdiligin arttyrady, - dedi depýtat.
Onyń sózine qaraǵanda, Qazaqstan mundaı kelisimderdi kóptegen elmen bekitti. Búginde Reseı, Germanııa, Nıderland jáne Frantsııa sııaqty memlekettermen qosa alǵanda, 20-dan astam ekijaqty readmıssııa týraly kelisim qoldanysta.
- Tsıfrlarǵa toqtalatyn bolsaq, 2025 jyly Іshki ister mınıstrligi readmıssııa týraly 111 ótinishti qarady. Onyń ishinde: Reseıden - 95, Germanııadan - 13, Nıderlandydan-1, Belgııadan - 1, Shveıtsarııadan - 1 ótinish boldy. Osylaısha, Aýstrııa Respýblıkasymen jasalǵan Kelisimdi qabyldaý jáne ratıfıkatsııalaý quqyqtyq yntymaqtastyqtyń senimdi tetigin qalyptastyrady, - dedi senator.
Aıta keteıik, jaqynda Prezıdent Qasym-Jomart Toqaev Qazaqstan men Frantsııa arasyndaǵy adamdardy readmıssııalaý týraly zańǵa qol qoıdy.