Aýstrııada sırııalyq azamat kóshedegi adamdarǵa pyshaqpen shabýyl jasady

ASTANA. KAZINFORM – Avstrııanyń ońtústigindegi, Italııa jáne Slovenııamen shekaralas Vıllah qalasynyń bas alańynda er adam kúndiz kezdeısoq ótip bara jatqan adamdarǵa pyshaqpen shabýyl jasady. Bul týraly Kazinform BBC-ge silteme jasap habarlaıdy.

– Oqıǵa ornynda 14 jasar jasóspirim qaza taýyp, taǵy 4 adam jaralandy. Olardyń ekeýi aýyr halde, - dep habarlady aýstrııalyq ORF telearnasy. 

Polıtsııanyń málimetinshe, jetkizý qyzmetiniń júrgizýshisi sırııalyq qaskóıdi kólikpen qaǵyp, shabýyldyń údeı túsýine jol bermedi. 

23 jastaǵy qandyqol qylmysker ustalyp, jeke basy anyqtaldy.

– Sırııadan qashyp kelgen onyń Aýstrııaǵa saıası baspana izdep kelgeni belgili boldy. Atalǵan memlekette sırııalyqtyń turýǵa ruqsatnama qujaty bar, - dep habarlady polıtsııa ókili Raıner Dıonısıo. 

Shabýyldyń sebebi ázirge belgisiz. Tergeýge polıtsııanyń ekstremızmge qarsy kúres bólimi qosyldy.