Aýstrııa men Slovakııada aptap ystyqtyń tarıhı rekordy tirkeldi
ASTANA. KAZINFORM – Ortalyq Eýropany jaılaǵan aptap ystyq saldarynan Aýstrııa men Slovakııada aýa temperatýrasy 41 gradýstan asyp, tarıhı rekord tirkeldi, dep habarlaıdy Deutsche Welle.
Aýstrııanyń ulttyq meteorologııalyq qyzmeti – GeoSphere Austria málimetinshe, Tómengi Aýstrııa federaldyq jerindegi Bad-Doıch-Altenbýrg qalasynda kúndiz aýa temperatýrasy 41,2°C-qa jetti. Meteorologtar muny «ekstremaldy jylý kúızelisi» dep baǵalap, ásirese halyqtyń osal toptaryna qaýip joǵary ekenin eskertti.
Buǵan deıin, 4 tamyzda, Aýstrııa astanasy Venada da rekordtyq ystyq tirkelip, aýa temperatýrasy 41°C-qa deıin kóterilgen edi.
Kórshiles Slovakııada Majarstanmen shekaralas Kamenıtsa-nad-Gronom eldi mekeninde termometr baǵany 41,4°C-ty kórsetti. Bul eldegi eń joǵary temperatýralyq kórsetkishterdiń biri sanalady.
Ekstremaldy aptap óńir ınfraqurylymyna da áser ete bastady. Ózenderdegi sý deńgeıiniń tómendeýinen keme qatynasy qıyndap, sý jáne elektrmen jabdyqtaý júıelerine qaýip kúsheıdi. Keıbir energetıkalyq nysandar elektr energııasyn óndirý kólemin qysqartsa, birqatar eldi mekende aýyzsý tapshylyǵy baıqalyp otyr.
Mamandardyń aıtýynsha, joǵary temperatýra aldaǵy kúnderi de saqtalady. Osyǵan baılanysty turǵyndarǵa kúnniń eń ystyq ýaqytynda syrtqa shyqpaý, suıyqtyqty kóbirek ishý jáne densaýlyq jaǵdaıyna muqııat bolý usynyldy.
Aıta keteıik, buǵan deıin Italııanyń barlyq 27 iri qalasynda aptap ystyqqa baılanysty eń joǵary – «qyzyl» qaýip deńgeıi jarııalanǵanyn jazdyq.
