Aýstrııa men Italııa janarmaıǵa salyqty tómendetýdi josparlap otyr
ASTANA. KAZINFORM – Aýstrııa men Italııa úkimetteri Taıaý Shyǵystaǵy jaǵdaıǵa baılanysty janarmaı baǵasynyń ósýine jaýap retinde salyqty tómendetý týraly sheshim qabyldady, dep habarlaıdy BILD.
Aýstrııa ýaqytsha mıneraldy otynǵa salynatyn salyqty azaıtýdy kózdep otyr. Alǵashqy kezeńde dızel men benzınge salynatyn salyq ár lıtrine 5 tsentke tómendetiledi. Bul týraly eldiń federaldy úkimeti málimdedi.
— Memleket daǵdarystan paıda tabýshy bolmaýy tıis, — dedi kantsler Krıstıan Shtoker.
Onyń aıtýynsha, janarmaı baǵasy ósken saıyn memlekettik kiris te arta beredi.
Jańa sharalardyń nátıjesinde Aýstrııada janarmaı baǵasy jalpy alǵanda lıtrine 10 tsentke deıin arzandaýy múmkin. Bul ózgerister 1 sáýirden keshiktirilmeı kúshine enýi tıis. Alaıda paket kelesi aptada parlamenttiń maquldaýynan ótýi kerek, ol úshin depýtattardyń úshten ekisi qoldaýy qajet.
Italııa da janarmaı baǵasynyń ósýine jedel áreket etti. Djordja Melonı úkimeti benzın men dızelge salynatyn salyqty kúrt qysqartty. Nátıjesinde baǵalar birden lıtrine 25 tsentke tómendeıdi. Sonymen qatar, kólik kompanııalaryna salyqtyq jeńildikter berilip, olar qosymsha tólemderden bosatylady.
Al Germanııa ázirge mundaı qadamǵa barmaı otyr. Búgin Býndestag ekonomıka mınıstri Katarına Raıhe usynǵan «táýligine bir ret baǵany kóterý» erejesin talqylaýda. Bul usynysqa sáıkes, janarmaı baǵasyn kúnine bir ret qana ósirýge ruqsat beriledi.
Buǵan deıin Taıaý Shyǵystaǵy qaqtyǵys saldarynan gaz baǵasynyń kúrt óskeni habarlanǵan.
