Aýstrııa bosqyndardyń otbasyn qaıta biriktirý protsesin ýaqytsha toqtatty
ASTANA. KAZINFORM – Aýstrııanyń úsh partııaly koalıtsııasy bosqyndardyń otbasyn qaıta biriktirý protsesin dereý toqtatý týraly sheshim qabyldady. Úkimettiń málimdeýinshe, áleýmettik júıe shamadan tys júktelip, bosqyndardyń aǵynyn ıgere almaı jatyr, dep habarlaıdy Euronews.
Adam quqyqtaryn qorǵaýshylardyń pikirinshe, bul baspana berý jónindegi eýropalyq zańnamany buzý.
Aýstrııa kantsleri Krıstıan Shtoker bul qadamdy halyqtyń kóbeıýine baılanysty áleýmettik qyzmetterdiń tolyq qýatynda jumys isteı almaı jatqanymen túsindirdi.
— Ýaqytsha toqtatý, men aıtqandaı, bul ýaqytsha shara. Sońǵy jyldary bizge kelgen adamdardyń qoǵam men bilim berý júıesine ıntegratsııalanýyn qamtamasyz etýge, sondaı-aq osy aǵymdy, ıaǵnı bizge keletinderdi de, qazir osynda turyp jatqandardy da basqarýǵa múmkindik berýge baǵyttalǵan. Aýstrııanyń múmkindikteri shekteýli, — dedi kantsler Krıstıan Shtoker.
Jańa sharaǵa sáıkes, «qorǵalǵan mártebesi» bar bosqyndarǵa (mundaı adamdardy deportatsııalaýǵa bolmaıdy) eger olardyń týystary áli de óz elderinde turyp jatsa otbasyn ákelýge ruqsat etilmeıdi. Jańadan qurylǵan Aýstrııa úkimeti mıgratsııany tejeýdi basty basymdyq dep jarııalap, baspana berý erejelerin qatańdatýǵa ýáde etti.
Resmı derekterge súıensek, ótken jyly otbasyn qaıta biriktirý baǵdarlamasy boıynsha Aýstrııaǵa 7 762 adam kelgen. Baspana izdeýshilerdiń kópshiligi Sırııa men Aýǵanstannan kelgen.
Sonymen qatar, Aýstrııanyń ishki ister mınıstri Gerhard Karner aqpan aıynda otbasyn biriktirý boıynsha bar bolǵany 60 ótinish túskenin málimdedi. Onyń aıtýynsha, bul sırııalyqtardyń ótinishteriniń kópshiligi Damaskide bılik ózgerýine baılanysty qaralmaǵandyqtan bolýy múmkin.
Buǵan deıin Aýstrııada jańa kantslerdiń ant qabyldaǵany habarlanǵan edi.