Aýstrııa Astana áýejaıyna 25 pasport oqý qurylǵysyn tabystaıdy
ASTANA. KAZINFORM — EQYU-men ózara is-qımyl aıasynda Aýstrııa Astana halyqaralyq áýejaıyna 25 pasport oqý qurylǵysyn tabystaıdy. Bul týraly QR Syrtqy ister mınıstri Ermek Kósherbaev málim etti.
Mınıstr 1 mamyrdan bastap kúshine engen dıplomatııalyq pasport ıeleri úshin vızasyz rejım jáne readmıssııa jónindegi kelisimder ekijaqty qatynastardaǵy mańyzdy kezeń ekenin basa aıtty.
— Aýstrııa EQYU-men ózara is-qımyl aıasynda Astana halyqaralyq áýejaıyna 25 pasport oqý qurylǵysyn tabystaıtynyn erekshe atap ótkim keledi. Parlamentaralyq baılanystarymyz da belsendi damyp jatyr. Parlamentaralyq dostyq toptarymyzdyń belsendi jumysy osy baǵyttaǵy yntymaqtastyqty arttyra túsýde. Osy oraıda Aýstrııa ulttyq keńesiniń ekinshi prezıdenti Peter Haýbner myrzanyń Astanaǵa byltyrǵy sapary parlamentaralyq dıalogqa jáne múmkindikterge jol ashty, — dedi E. Kósherbaev Syrtqy ister mınıstrliginde ótken brıfıngte.
Mınıstr Shyǵys pen Batys arasyndaǵy tranzıttik kópir retinde eki el óńirlik ózara baılanys pen saýdada mańyzdy ról atqaratynyn jetkizdi. Sondyqtan saýda-ekonomıkalyq jáne ınvestıtsııalyq yntymaqtastyq san qyrly baılanystardyń negizgi qozǵaýshy kúshteriniń biri bolyp qala beredi. Osy saladaǵy áriptestikti damytýǵa serpin beretin negizgi tetikter — Úkimetaralyq komıssııa men iskerlik keńes qyzmetteri belsendi jalǵasyp jatyr.
— Qazaqstanda aýstrııalyq kompanııalardyń qatysýymen kóptegen birlesken kásiporyn jemisti qyzmet atqaryp keledi, munda 400-den astam aýstrııalyq kompanııa bıznes júrgizip otyr. Elderimiz arasynda taý-ken ónerkásibi, kólik jáne ınfraqurylym, energetıka, týrızm jáne bilim salalaryndaǵy yntymaqtastyqtyń áleýeti zor. Qazaqstan Aýstrııaǵa munaı jetkizýde negizgi áriptes retinde energetıkalyq qaýipsizdik pen jetkizilimder turaqtylyǵyn qamtamasyz etýge eleýli úles qosyp keledi, — dedi QR SІM basshysy.
Aýstrııalyq kompanııalar úshin Qazaqstannyń kólik-logıstıka salasynda, ásirese Orta dálizdi jáne óńiraralyq kólik baılanysyn nyǵaıtýǵa baǵyttalǵan Global Gateway bastamasyn iske asyrý aıasynda tamasha múmkindikter ashylyp jatyr. Búgin de eki el iskerleri arasynda ótetin dóńgelek ústel ekonomıkalyq áriptestikti ilgerilete túspek.
— Búgin biz halyqaralyq kún tártibin de talqyladyq. Qazaqstan men Aýstrııa qazirgi syn-qaterler tek beıbit jolmen BUU jarǵysyna sáıkes sheshilýi tıis degen ortaq ustanymda. Kezdesýimiz elderimiz arasyndaǵy ózara túsinistiktiń joǵary deńgeıi men strategııalyq maqsattardyń ortaq ekenin rastady. Birlesken kúsh-jiger Qazaqstan-Aýstrııa áriptestigine jańa serpin berip, yntymaqtastyq arnasyn keńeıte túsetinine senimdimiz, — dedi Ermek Kósherbaev.
Aıta keteıik, Aýstrııa Respýblıkasynyń Eýropa jáne halyqaralyq ister jónindegi federaldyq mınıstri Beate Maınl-Raızınger resmı saparmen Astanaǵa keldi. Sapar aıasynda ol Qazaqstannyń Syrtqy ister mınıstri Ermek Kósherbaevpen kezdesti.
Buǵan deıin Qazaqstan men Aýstrııa arasyndaǵy zańsyz júrgen adamdardy readmıssııalaý jáne tranzıtteý týraly kelisim ratıfıkatsııalanǵan edi.
Byltyr Aýstrııa Respýblıkasy Federaldyq Parlamenti Ulttyq keńesiniń ekinshi prezıdenti Peter Haýbner Astanaǵa kelgen edi.
