Aýstralııanyń shyǵys jaǵalaýynda orman órtenip jatyr
SIDNEI. QazAqparat – Aýstralııanyń shyǵys jaǵalaýynda jalyndap jatqan ondaǵan orman órti aptaq ystyq toqtamaı jatqandyqtan kúsheıýi múmkin, dep habarlaıdy QazAqparat BBC News agenttigine silteme jasap.
Eki jyl jaýyn-shashyn men sý tasqyndarynan keıin jyly aýa raıyna qaıta oralý 2019-2020 jyldardaǵy «qara jaz» maýsymynan bastap Jańa Ońtústik Ýels shtatyndaǵy órtke sebep boldy.
Máselen, Sıdneıden soltústik-batysqa qaraı 250 shaqyrym jerdegi órttiń bıiktigi 10-15 metrge jetti.
Aýstralııanyń eń tyǵyz ornalasqan shtaty – Jańa Ońtústik Ýelstiń zardap shekken turǵyndaryn evakýatsııalanýǵa shaqyrdy. Birneshe nysannyń zaqymdalǵany týraly aqparat bar.
Shtattyń keı bóligindegi temperatýra 2021 jyldyń qańtarynan beri alǵash ret dúısenbide 40°C-qa jetti.
Órt sóndirýshilerdiń sózinshe, seısenbi kúni shtatta áli 33 órt jalyndap jatqan bolatyn, onyń 10-yn baqylaýǵa alý múmkin bolmady.
Jańa Ońtústik Ýels órt sóndirý qyzmeti kúshti jel órttiń tez taralýyna sebep bolǵanyn málimdedi.
Aýstralııa meteorologtary Jańa Ońtústik Ýelstiń shyǵys bóliginde naızaǵaı oınap, jańa órtke ulasýy múmkin ekenin eskertti. Boljam boıynsha, ystyq ári qurǵaq aýa raıy sársenbige deıin jalǵasady.
Shyǵys Aýstralııada úsh jaz qatarynan ortashadan joǵary jaýyn-shashyn mólsheri aýqymdy sý tasqynyn týdyryp keledi.
2022 jyl Sıdneıdiń baqylaý tarıhyndaǵy eń ylǵaldy jyl bolyp tirkeldi.
Aýstralııadaǵy eń qorqynyshty tabıǵat apattarynyń biri – 2019-2020 jyldardaǵy «Qara jaz» órtinen 33 adam men 3 mıllıardqa jýyq ań-qus mert boldy.
