Aýstralııalyq kompanııa SQO-da geologııalyq barlaý jumystaryn bastady
ASTANA. QazAqparat - Soltústik Qazaqstan oblysynyń ákimi Qumar Aqsaqalov Ǵ. Músirepov aýdanyna issapary barysynda «Iluka Exploration Kazakhstan» JShS taý-ken qazý kásipornynyń qyzmetimen tanysty. Bul jaıly «QazAqparat» HAA oblystyq ákimdiktiń baspasóz qyzmetine silteme jasaı otyryp habarlaıdy.
«Iluka» - mıneraldy qumdardy izdeý jáne zertteýmen aınalysatyn transulttyq kompanııa. Ol álemdegi tsırkon men rýtıl óndirýshi eń iri kompanııalardyń biri. Bıylǵy jazda kezdesip, óńirdegi geobarlaý jumystarynyń josparyn talqylaǵan bolatynbyz» - deıdi ákim Q. Aqsaqalov.
Zertteýlerdiń qalaı júrgizilip jatqany jaıly óńir basshysyna kompanııanyń bas dırektory Tonı Tornton áńgimelep berdi. «Qazir biz Soltústik Qazaqstanǵa kóp kúsh jumsaýdamyz. Qostanaı oblysyndaǵy jumystardy jýyrda ǵana aıaqtadyq. Kompanııamyz mıneraldy qumdardy barlaý, jobalardy ázirleý, óndiris, marketıng jumystaryn júrgizedi jáne ken óndirilgen jerlerdi qalpyna keltiredi», - dedi Tonı Tornton.
Oblys ákimi alǵashqy nátıjeler qashan belgili bolatynyna qyzyǵýshylyq tanytty. Tonı Tornton olardy qysta alýǵa bolatynyna úmit artatynyn jetkizdi. Eger mıneraldy qumdar tabylsa, óńirde olardy óńdeýmen aınalysatyn zaýyt salynady.
